隔牆有耳:設計超高能 
PoPo最叻 把弄事實與謊言(李八方)

更新時間 (HKT): 2021.03.04 02:00
■十頁特刊內容舊調重彈,首頁將「Fake」「Fact」字母替換設計,講到玩弄事實與謊言,PoPo最擅長。

手機用戶請按此放大圖表

成功擴軍、增逾250億「軍費」預算嘅PoPo噚日有新搞作,警隊刊物《警聲》整咗《認清事實—謠言謊話真不了》十頁特刊,聲稱要澄清抹黑,仲話警隊係歷盡磨難涅槃重生,但大部份內容舊調重彈,不過一打開,八方發現其中一張圖嘅設計,係警徽之下「Fake」「Fact」替換,「事實抑或謊言,你可主宰」。係咪暗示警隊把弄事實?香港設計界真係卧虎藏龍。

維穩特刊繼續吹

講返內容,PoPo強調8.31冇死人、新屋嶺冇強姦,仲話「個別傳媒」接二連三發放誤導訊息,語帶怪責話過去一年發逾百封澄清同駁斥信從未獲回覆。相信PoPo所指就係《蘋果》,皆因同事三日唔埋收到PoPo情信譴責敝報,不過唔講一直仲想我哋回覆。

八方要替同事抱不平,12港人事件,本報揭發送中黑幕,去年8.23警方要求飛行服務隊緊急空中搜索,兩警登上定翼機,新聞界追問警方當日點解登機,但警方一直封口;反送中運動期間,同事每見警暴發生都入Q追問,前後入Q過百條,統統冇回覆。

再舉例,舊年3月5號,有交通警被拍到雙手離軚扮雀。總警司向立會辯稱有「澳洲案例」支持做法,時任議員朱凱廸向澳洲警方追問,當局回覆冇使用相關駕駛技巧。PoPo從此避開唔講。又例如8.31事件,有速龍向消防救護訛稱太子站內冇傷者,事實係站內多人頭破血流,警方從未道歉,亦冇懲處大話速龍。八方覺得,民間如果出本《警謊》對撼,又何止十頁?拎住咁多維穩費出十頁內容,夠唔夠穩住藍絲基本盤?

李八方

一格照片,一個故事,Follow蘋果Instagram!
BannerBanner