47民主派提堂︱冷雨無阻旁聽師 少女哽咽:佢哋係我哋60萬人一齊投票初選出嚟

更新時間 (HKT): 2021.03.04 22:06
在審訊的第四天,一眾旁聽師仍然無懼風雨,到場支持47名民主派。

47名民主派初選人士被控串謀顛覆國家政權今天(4日)已是案件連續第四天提堂。這四天,雨沒有停過,卻一直只是毛毛細雨,是不禁流淚的上天在憐憫在法庭外守候的人們嗎?「佢哋係我哋60萬人一齊投票初選出嚟,唔應該淨係佢哋受苦」,外套也沒穿就來排隊少女哽咽。還有明知沒機會進庭旁聽的藝術家說,今日堅持來排隊,不談藝術,只談民意。

馬拉松式的世紀審訊,苦了被告、苦了家屬和辯方律師們,記者們在法庭走廊和大堂外席地而坐。還有在法庭鐵欄外風雨不改連日守候的是一班熱心同路人。下午,法院外刮着狂風,細雨也變得刺痛冰凍。多名軍裝和便衣警重兵駐守監視,但排隊等候入場旁聽的市民不減反增,隊伍一度由法院正門繞到後方英華街。有婆婆累極坐在濕透的花槽,有嬸嬸遊走人群間派發雨衣,還有撐枴杖的長者舉起寫上47人姓名的紙牌,默默等待。

「香港每個有共同信念的人都會陪住你哋」

長長人龍中,有連外套也沒有穿的梁小姐,下班後先特意到「阿布泰」購買港製口罩,再匆匆趕來排隊。她說,知道入不到去旁聽,亦不知道法庭內的被告們會否知道有人在庭外守候,「就係想行出嚟,唔想坐喺屋企。結果係點都好,起碼我哋都係喺一齊,一齊撐落去」。

由前年6.12暴政向平民開槍的那刻起,梁小姐說,自己就不再是只顧工作的「港豬」,「已唔係政治問題,係良知問題」,政權種種暴政積累下來,「呢個政府已唔再屬於我哋,亦唔配做我哋嘅政府。」

她說,早在初選時已預料到,民主派或被政權清算,但一切來得比想像中突然,這幾天心情低落,「睇新聞就會喊」。惟她說,或許到最後47人均要入獄,「但如果我哋都放棄,就真係放棄埋入面嘅佢哋,除咗有47人,仲有好多好多(入獄手足),唔係話灰就可以乜嘢都唔做」。

「佢哋係嗰時我哋60萬人一齊投票初選出嚟,唔應該淨係佢哋受苦,應該要一齊承受呢啲結果,雖然自己真係做唔到啲咩、亦承受唔到啲咩,只係想行出嚟」,她哽咽說:「大家一直都係想爭取同一樣嘢,一齊付出過,係同路人。我哋堅守同一個信念,無分你我。」

隻身前來的她說,知道即使自己甚麼也無做,仍有被捕的風險,「但唔係驚就唔使出嚟」。她又寄語47人:「香港每個有共同信念的人都會陪住你哋。就算我哋唔喺你隔籬,心入面都好想你哋知道,無論你哋身處何方,即使係坐監,都會陪住你哋。」

明知未能入庭旁聽 程展緯照排隊:用身體話畀人知反對

隊伍中還有本地藝術家程展緯,「都係想對入面47名唔知點解成為被告嘅被告打氣」。他說,自己有份在初選投票,「唔覺得呢個選舉係危害國家安全」。他指,每個投票都是彰顯選民或民意,亦不認為初選與過往其他的投票有不同,「究竟民意表達係危害國家安全,還是成為管治者一個自我修正嘅機會?佢(政權)點睇我哋控制唔到,但公民嘅角色好重要亦好簡單,就係將自己想法透過一個和平嘅選舉投票表達。」

程說,不認同被告簽署《墨落無悔》抗爭書就等於顛覆國家政權,批評政府這樣不但沒有理會初選民意,亦是放棄令民意呈現的選舉和自我修正的機會,「(灰心嗎?)香港而家咁嘅環境,個個都會。呢幾日嘅香港好似變得好陌生,好似唔再係以前咁樣,可以透過討論、辯論去達致修正的可能。唔知係咪不可逆轉,雖然唔知今日個結果係點,但見唔到合理嘅發展」。

「呢個地方應該係每個人都可以將自己意見表達出嚟,成條隊嘅人都知唔會入到去,但都想用身體話畀人知,我哋係反對呢件事。」程說今日不談藝術,只談民意。47人當中有認識的朋友,也有啟蒙他政治和公民想法的人,「呢幾日一直諗都諗唔到可以同佢哋講咩說話,好希望佢哋平安,最低限度,心境平安。」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

一格照片,一個故事,Follow蘋果Instagram!
BannerBanner