隔牆有耳:膠板扮探監 自由黨區佬涼薄當有趣(李八方)

更新時間 (HKT): 2021.03.04 02:00
■自由黨林偉文隔住防疫膠板叫人嚟探監,坐對面嘅兩位民主派議員張嘉莉同李永財竟然「陪玩」。

有啲笑,唔可以亂講!除咗47子,過去呢兩年唔少港人為爭取民主自由被囚,前日灣仔區議會開會時候,灣仔區議員、自由黨林偉文竟將防疫膠板當探監玻璃板,仲叫啲民主派區議員嚟探吓監,而竟然有民主派區議員搭訕。看在眼裏嘅另一位民主派區議員陳鈺琳喺facebook上載片段,留言「嬲到喊」。

民主派陳鈺琳嬲到震

灣仔區議會前日召開撥款及常務委員會,休會期間,林偉文返埋座位嗰陣,突然上演「監獄風雲」,隔住防疫膠板問候坐喺對面位嘅兩位民主派議員張嘉莉同李永財:「點呀?呢排身體點?」;張嘉莉笑住話同屬建制派嘅區議員謝偉俊走咗嘞,叫林:「諮詢吓律師啲意見先啦!」但此舉無阻林偉文「表演慾」,追問「嗰單嘢搞成點?」又叫佢哋記得嚟探監,李永財就忍唔住答嘴:「OK!探緊。」

相信唔少人睇完條片,唔會覺得好笑,只係覺得好可悲;有網民亦留言叫陳鈺琳唔好嬲,「大家層次唔同」。

李八方

一格照片,一個故事,Follow蘋果Instagram!
BannerBanner