47民主派提堂︱送車師散佈囚車路線 抗警以限聚令驅趕 :越驚越唔出聲 就迫得你更多

更新時間 (HKT): 2021.03.05 00:57
有送車師向囚車展示心形手勢。本報記者攝

「初選47子」世紀大審訊暫告一段落,所有被告均需繼續還柙,警方佈防亦與以往數天的審訊有所分別。以往一眾送車的市民可於法院外的通州街行人路上等囚車離開,惟今天警方封鎖法院附近的道路,令市民只能以一條單程路離開。不過,「送車師」仍然散佈到其他囚車會經過的街口,甚至遠至荔枝角仍有他們的足跡,惟警員不時亦會以四人限聚令趕走市民。有市民哽咽指,自己邊看審訊的報道「覺得個心好唔舒服」,因為今早已到法院企足12小時,希望略盡綿力向同路人寄予支持。

今日11時已到場的張小姐指,自己到法院時,所有旁聽的籌已派完,因此未有入庭旁聽,但仍留在法院外企足12小時,等待囚車離開。她哽咽指,自己邊看審訊報道「覺得個心好唔舒服」,「個無力感好重,想為佢哋做返啲嘢,做咩都好,就係要畀佢哋知,我哋仲有人撐佢。」

聲援市民斥律政司「扮到好有法治」

張坦言,全部人不准保釋是其預計中的結果,「你都知而家啲官啦,無期望就無失望」。不過,對於律政司的上訴,她明言亦不覺得驚訝,「我覺得佢哋做嘢手法就係咁,要扮到好有法治」,亦感嘆指法治已不再存在,「而家留喺香港嘅人,只係為咗生存,唔係生活」。張寄語港人「唔好放棄」,「入面嘅手足都係,每次諗起佢哋都覺得好難過,佢哋已經付出得太多,所以我哋要撐住」。

下班前來的MH則是第三天到法院聲援47子,「一嚟係畀個支持,亦要畀政府知,香港人係無忘記到」。她認為,47子被控的罪名是「莫名其妙」,「話佢哋危害國家安全,但佢哋只係搞初選,呢樣野係《基本法》框假入面容許嘅嘢,咁其實係咪即係《基本法》都危害國家安全?咁不如剷咗佢啦!」。

MH指,自己看過以往民主派被控的相關案件,如黎智英、譚得志等人,統統都未能獲保釋,結果是預料之內。不過,MH形容律政司一舉是「玩嘢」,「咁你點解要咁樣做啫?咁你咪全部唔好畀保釋囉!」她希望港人加油,「相信真相」。

「如果你越驚、越唔敢出聲,就會迫得你更多」

馮小姐與女友人在荔枝角附近練球,其後前來化身「送車師」。馮指,政權正正希望使用恐懼恫嚇港人,「佢擺到明就係打壓你,所以如果你越驚、越唔敢出聲,就會迫得你更多」。對於律政司的舉動,馮亦指是預計之內,「因為佢就係要咁樣做,同埋佢要話到明畀你知『我就係會咁樣』」。

馮指,認為現今香港已無法治可言,「法律面前,人人平等,但佢哋(47子)由第一日開始已經無得沖涼,無得更衣,已經係好唔人道嘅事」。她指,政權以《國安法》令港人「無得企得再出」,希望國際社會可以幫忙,港人亦要堅守信念,「勝利終有一日會喺我哋呢邊」。

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

一格照片,一個故事,Follow蘋果Instagram!
BannerBanner