隔牆有耳:謀再選特首 689露完口風即縮(李八方)

更新時間 (HKT): 2021.03.05 02:00
梁振英

眾所周知對重掌權力蠢蠢欲動嘅政治閒人689,多次盛傳會捲土重來,佢早前接受「外國勢力」《路透社》訪問,就露出曖昧姿態,被外媒記者問會唔會再選特首時,話自己「會竭盡所能為香港服務,為國家服務」,仲形容自己係「數百萬合資格參選者之一」,同四個月前話自己無意選特首嘅口徑明顯唔同晒,難怪外界一致解讀,都係意味有人唔排除會重返昔日特首之位,點知689噚日即縮,唔肯再講係咪選特首。

疑怕做出頭鳥中箭

呢位全國政協副主席正喺北京準備出席兩會,唔知點解對住唔係「外國勢力」嘅港台專訪,被人問係咪選特首,又擺出另一姿態,話唔想自己喺參選特首呢個問題,成為現階段焦點,但呢個理由喺一日前佢接受《路透社》訪問,唔通又唔存在咩?定還是心知如果搶住做出頭鳥,隨時會率先中箭,所以先猶抱琵琶半遮面?套用大陸護法田飛龍日前撰文,講明中央唔要「忠誠的廢物」,仲話北京對領導崗位提出升級要求,服務唔好市民就必須下台。睇番689往績,當日以低民望、低票數上任,係咪值得被循環再用?大家應該有晒答案啦!

李八方

一格照片,一個故事,Follow蘋果Instagram!
BannerBanner