李八方online︱聯合醫院女更衣室貼紙預告警察巡查 話明有男士入內

更新時間 (HKT): 2021.03.06 14:45

聯合醫院日前一張通告,引發院內部份員工唔少擔憂。八方收到風,聯合醫院幾日前喺一個女更衣室內貼咗張通告,話星期四(4日)下晝會有「警察巡查」,仲話到時會有「男士在內」。雖然院方都係好心提醒,但張通告無交代係咩事,令到唔少喺聯合做嘢嘅女醫護人員都好擔心。

有醫護人員同八方講,通告所講嘅巡查時間,都好接近同事換班,加上通知無端端話會有男士在場,同話有警察巡查,班同事都好擔心。雖然同事有打過電話去院方問咩事,但對方只係話「例行巡查」,始終都未釋除到疑慮。

八方即刻問番警方同聯合醫院求證,原來係聯合醫院保安部邀請東九龍總區防止罪案辦公室,去醫院做「保安巡查」,主要係防止有人在更衣室內偷裝針孔攝錄鏡頭。警方話,當日警方人員係由院方保安部管理人員同後勤部人員全程帶領下,進入已清場嘅女更衣室,去提供保安意見。

聯合醫院就講,巡查係讓警方就保障員工私隱同安全提供意見,又話會對通告未清楚闡述視察安排詳情而引起誤會作檢討同改善。

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

一格照片,一個故事,Follow蘋果Instagram!
BannerBanner