疫苗接種︱官涌體育館兩宗接種科興後死亡個案 市民照撐:冇嘢呀!你睇我幾開心

更新時間 (HKT): 2021.03.06 20:11

繼上月底,一名嚴重長期病患的63歲男子接種中國科興疫苗兩日後死亡後,國產疫苗再添一宗接種數日內死亡個案。55歲女子本周二(2日)接種中國科興疫苗,3日後懷疑中風入住廣華醫院,至翌日即今凌晨離世。兩宗個案死者均在官涌體育館社區疫苗接種中心接種疫苗。

惟記者今到官涌疫苗接種中心觀察,到場接種疫苗的市民普遍表示不擔憂,有市民指「唔使講咁多,(科興疫苗)就係好」;有年長女士指接種疫苗「OK呀」,更指「冇嘢呀!你睇我幾開心!」也有人表示不擔心:「如果你要中就中㗎啦」,指接種後「可以周圍去囉」。

已預約接種第二劑科興:政府推得出嚟一定係有信心啦!

年長的馮先生,來到中心前已從新聞中得知到最新的死亡個案,但表示不擔心,認為只是個別案例:「唔會嘅,個別嘅健康情況啫,呢啲(死亡個案)。」又指接種完中國科興疫苗後感覺「冇乜嘢」。

馮先生稱已預約接種第二劑中國科興疫苗,指接種後「梗係好(安心)喇」。雖然有關科興疫苗相關的負面消息不斷,他仍對之保持信心:「政府都推得出嚟,一定係有信心㗎啦!(即係都覺得信政府無錯嘅?)應該係啦!」

「年輕就應該要打,唔通最老嗰班打呀?」

即使有新的疫苗接種後死亡個案,年輕的王先生亦表示毫不擔心,更指「咁都唔知關唔關個疫苗事」。被問及不擔心的原因,他重複指「總之我覺得唔關事啦」,後來補充說「醫生都話唔關事」,記者再追問,指專家下周一才會開會討論這個個案,他又回應指「係咩,唔知喎」。

他形容接種疫苗是「應該要做嘅嘢」:「係啦,冇錯,年輕就應該要打,咁唔通最老嗰班打呀?如果有副作用嘅話。(後生會復元得快啲?)嗯。」

撐科興:都係自己中國人,支持返!

已屆60歲的周女士表示,來接種中國科興疫苗前不知道新增一宗接種後死亡個案,但她稱:「唔擔心喎,如果你要中就中㗎啦,你中咗你都係咁㗎啦,你打咗安心啲啦!」

周女士又指,接種後頗安心:「都係有啲(安心)嘅,你可以周圍去囉,冇咁擔心囉,應該好啲嘅!」她給科興疫苗90多分,表示雖然無法將其與BioNTech疫苗作比較,但會打科興疫苗:「都係自己中國人,都支持返(科興疫苗)!」

有不願接受訪問的中年女士,在接種疫苗離去後,一邊離去一邊向記者豎起大拇指,大聲稱:「唔使講咁多,(科興疫苗)就係好!」亦有不願具名的年長女士,指接種疫苗「OK呀」,更興奮向記者表示「冇嘢呀!你睇我幾開心!」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

一格照片,一個故事,Follow蘋果Instagram!
BannerBanner