李八方online︱政協常委吳良好擦鞋示忠:國安法實施日 唔少人舉五星旗流淚慶祝

更新時間 (HKT): 2021.03.07 15:06

每年北京兩會,都係人大政協嘅「表演」舞台,一場場擦鞋示忠戲,不停上演。

今日全國政協召開第二次全體會議,就由全國政協常委、香港福建社團聯會榮譽主席吳良好突圍而出。唔知吳良好係咪活於另一個時空?佢喺大會發言時話喎,《國安法》6月30日宣佈實施後,「從中午到子夜,我和許多香港市民一樣,心情激動。不少人走上街頭高舉五星紅旗,表達興奮心情」,又指國安法實施半年多,香港社會安定,市民安全,人心安寧:「6月30日這一天,人們再次流淚,這是激動的淚,是欣慰的淚。」

但唔少港人當時見到,「港版國安法」晚上宣佈實施後翌日,大批港人唔理係咪會畀人拉,喺街頭展示當時仍未知已經被認定為違法標語嘅「光復香港 時代革命」旗幟,亦有唔少港人上街高叫爭取民主嘅口號;當日確實有唔少人流淚,但只係為港人痛失自由民主同人權而落淚,同吳良好嘅描述,差天共地。

好戲更在後頭。吳良好仲話呀,《國安法》實施後,香港安定咗,直言:「年初二在車公廟求的籤,也比不上《國安法》這支上上籤」,重申香港治理者必須熱愛國家、擁護中共,支持修改香港選舉制度,用制度保證愛國者治港,總結時鞋油更足:「我堅信,有習主席和中央的關心支持,有偉大祖國做堅強後盾,有愛國者治港,香港的明天一定會更美好!」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

一格照片,一個故事,Follow蘋果Instagram!
BannerBanner