47民主派被控︱還柙眾人苦中作樂 「冇因高牆鐵欄而喪志」

更新時間 (HKT): 2021.03.07 13:24

47名民主派人士因參與民主派初選被控「顛覆國家政權罪」,除4人獲准保釋候訊外,大部份人仍然身陷囹圄。今早(7日)陸續有多名被捕人士親友到荔枝角收押所探訪,他們均表示牆內的人情緒尚算輕鬆,以苦中作樂面對還柙生活。其中劉頴匡女友Emilia指,雖然眾人是單獨囚禁,但不時都會隔空互相嘲笑、聊天,如劉便曾笑問楊岳橋:「你而家夠精采未啊?大家而家都好精采」;郭家麒太太亦引述指,郭形容還柙「好似幾廿年前入大學迎新營」。她又勉勵其他家屬不要太愁雲慘霧,「無奈之中惟有笑下」。

荔枝角收押所今日陸續有被捕者親友到場探訪,包括探望柯耀林的西頁區議員鄭仲文、探望長毛的吳文遠等,探訪室外大排長龍,但過程大致順利,大部份人都在約兩小時內離開。劉頴匡女友Emilia指,早上見面兩人均心情輕鬆,劉表示開始習慣收押所的規律生活,單獨囚禁時更不時會「嗌去隔離倉,同佢哋互相自嘲吓」,譬如會笑問楊岳橋:「你依家夠精采未啊?」而楊則笑着回覆「X你呀」。

Emilia指,初選被捕者在探訪室內的位置相近,劉頴匡旁邊便是楊岳橋及王伯羽,笑言他們互相「攬住」,似乎繼續有「大和解」迹象,而他們在還柙生活中亦學懂苦中作樂,「互相嘲笑大家、自嘲吓,仲識得自嘲話大家而家好精采」。又如劉吃囚犯飯時,「有塊雞柳、一隻蛋就話係親子丼,佢話作完之後都覺得OK」。她又指,除了早前帶進去的《魔戒三部曲》外,亦為劉訂閱了《蘋果日報》,本來應於今日開始收到,但劉指仍未有消息,估計「應該要啲時間批」。

郭家騏:當去訓練營

郭家騏太太探訪後指,郭精神狀況良好,「話啲飯都唔係太難食,一日做三次運動,但送畀佢啲物資需要啲時間(才到手)」,又指本來帶來了一本《聖經》,但懲教署指不符合規格,拒絕送進收押所內。原獲准保釋的郭,因律政司上訴而需繼續還柙,郭太形容如同被人「打劫」,但郭自己則形容「當去訓練營,不過個訓練營又延長咗」。郭太又笑言,被還柙的眾人「喺度『大和解』咁,有時放風喺操場度一齊玩,好似幾廿年前入大學迎新營,頭先有個人話佢哋喺度ice breaking」。

郭太指,他們在收押所內都以苦中作樂面對,「無奈之中惟有笑吓」,並勉勵其他家屬「唔好太愁雲慘霧,你俾人打劫咋嘛,又冇仇報嘅,開心啲,加油!」她又感謝香港人支持,「呢段時間睇到啲香港人真係好好」。

吳文遠:長毛so far so good

社民連吳文遠今日亦再到場探訪「長毛」梁國雄,他形容長毛情況「so far so good」,「都係咁,因為都唔知第幾次坐監」。他亦收到香港人的支持聲音,目前正在埋頭寫詩。吳又稱,長毛表示還柙生活很悶,但明起一連5日,他每天都要到法庭應訊,「起碼我哋都可以日日喺法庭見佢揮吓手、鼓勵吓佢」。吳指,探訪室內長毛附近是郭家麒、岑子杰及施德來等,形容他們「喺入邊又係柴娃娃咁」,笑言自己更交代岑及郭「要睇實長毛」。

施德來託太太交代公務

施德來太太指,因早前已探望丈夫,笑言「啲談情說愛嘅嘢已經過咗」,故今日主要是交代公務,但認為僅15分鐘探訪時間實在有限。施太又指,丈夫在收押所中仍然放不下區議員工作,交代她代為安排不少公務,如跟進中的個案、文件,以及辦事處員工的工作安排等。施太稱,因夫妻倆都有宗教信仰,故他們都「相信有盼望,期待公義嘅來臨」。

羅健熙指尹兆堅精神狀況良好「有講有笑」

民主黨主席羅健熙及前立法會議員張文光結伴探望尹兆堅。羅指尹精神狀況良好,「同佢有講有笑」,而今日主要是交代民主黨公務,但15分鐘探訪時間略嫌不足,「盡量佢一路講我哋一路寫」。羅又指,作為黨友看到尹情況良好感到放心,但仍然很感觸,「成件事都係一件唔合理嘅事,見到啲黨友咁樣喺裏面坐,點都係一件好傷心嘅事」。

呂文光指范國威「食咗好多飯,肥咗少少,精神OK」

新民主同盟任啟邦及呂文光今日到場探望范國威,而身處赤柱監獄的鍾錦麟及譚凱邦,則會由其他黨友探望。任指,范國威在收押所內生活安好、作息定時,膳食方面亦沒有太大問題;呂則指他「食咗好多飯,肥咗少少,精神OK」。他們又引述范國威指,他「冇因高牆、鐵欄而喪志」,又呼籲香港人要加油努力。

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

一格照片,一個故事,Follow蘋果Instagram!
BannerBanner