李八方online︱又揚澳貶港?韓正讚澳門辦好防疫 其他事亦可以辦好

更新時間 (HKT): 2021.03.07 14:33
澳門因為防疫工作做得好,獲北京領導人高度讚賞。資料圖片

成日要北京領導人提示住點樣防疫抗疫,唔知香港政府有冇覺得唔好意思?尤其一海之隔嘅澳門,因為防疫好獲領導人高度讚賞,年年考第一嘅林鄭認真恨唔到。

主管港澳事務嘅副總理韓正同港澳辦主任夏寶龍,今日上午參與咗澳門人大代表團會議。據報,有與會者會後引述,韓正席間高度表揚澳門抗疫表現,希望澳門可以繼續鞏固來之不易嘅防控成績,更認為辦好防控防疫工作,其他事情亦可以辦好。唔知係咪想講未有辦好防控防疫工作嘅特區政府,其他事都辦唔好?

據報韓正亦指,中央今年會公佈一系列有力措施,支持澳門喺橫琴發展,亦認同澳門多元化發展目標,希望澳門特區政府同中央能更好溝通,反映市民所想所需。

新華社指韓正促港府認真完善香港選舉制度的決定

新華社其後下午出稿,話韓正噚日下晝喺北京釣魚台國賓館,分別會見咗香港特首林鄭同澳門特首賀一誠,充分肯定港、澳特區,過去一年喺防控疫情、紓解民困、恢復經濟方面所做嘅工作。

報道特別指,韓正希望香港政府繼續將疫情防控作為當前中心任務,喺有效防控疫情前提下統籌同做好經濟社會各方面嘅工作,同時要認真落實人大有關完善香港選舉制度嘅決定,以及就人大常委會對香港《基本法》兩項附件嘅修改,做好香港本地立法相關工作,確保香港「一國兩制」實踐始終沿住正確方向前進。

據報林鄭同賀一誠感謝中央政府對港、澳發展嘅大力支持,會按照中央要求,積極作為,履職盡責,保持港、澳長期繁榮穩定。

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

一格照片,一個故事,Follow蘋果Instagram!
BannerBanner