李八方online︱葉劉為咗「白宮發言人」掌嘴: 我唔敢得罪佢啊!

更新時間 (HKT): 2021.03.08 15:52
新民黨主席葉劉淑儀認同建制派會大洗牌,講到馮煒光都可能會參選時,佢竟然衝口而出話「佢機會就細啲」。

全國人大會議即將審議修改香港各級選舉的決定,除咗民主派生存空間被扼殺,建制派都淆底,皆因親北京人士都放晒口風。身兼行政會議成員嘅新民黨主席葉劉淑儀都認同,建制派一定大洗牌,咁建制派有啲乜人有機會in,有咩人會out呢?葉太被問到自比「白宮發言人」嘅前任新聞統籌專員馮煒光都有可能參選時,諗都唔使諗話:「咁佢機會就細啲!」

本身都係直選議員嘅葉太今日喺電台節目話,希望地區直選會保留至少30席,因為直選議員接地氣。咁得返30個建制派夠唔夠分?葉太就話如果採用雙議席單票制,泛民應該可以拎到10至15個議席,但現任建制派議員好多都話咗要退休,佢希望建制派可以「出啲後生、精鋭、學歷好啲,知識水平高啲嘅出嚟」。葉太喺佢自己列嘅條件之中,唔知中咗幾多樣?

之但係選舉失去代表性,民主派支持者隨時杯葛選舉,葉太就話冇有怕,相信採用雙議席單票制,投票率會低啲,但一定有民主派人士出嚟參選,「(前民主黨)狄志遠都話咗會」。葉太仲點名話香港電視主席王維基太太、總商會前行政總裁袁莎妮參選一定掂啊。

當主持問到馮煒光參選又點?葉太秒答話對方機會細,不過又即刻話要掌嘴,「我唔敢得罪佢啊!」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

一格照片,一個故事,Follow蘋果Instagram!
BannerBanner