李八方online︱唔跟隊打科興表忠 76歲曾蔭權接種BioNTech自保

更新時間 (HKT): 2021.03.08 22:53
林鄭同其他一眾官員對科興有讚無彈,但76歲嘅前特首曾蔭權,依然決定「力排眾議」打BioNTech。

為貫徹落實「愛國者治港」,63歲特首林鄭月娥上月底,率領一眾平均年齡約60歲嘅高官,無視內地唔建議60歲以上人士同長期病患者接種國產科興疫苗嘅指引,率先接種國貨表忠,讓身體注入滿滿的愛國治港正能量!兩名已貴為全國政協副主席的前特首董建華(83歲)同梁振英(66歲),亦已身先士卒接種科興疫苗,絕對符合政府話齋:「愛國者的標準是尊重自己的民族。」

不過,科興疫苗近日接連發生事故,累計已有3人接種科興疫苗後死亡,另有45宗送院嘅嚴重事件,唔少人取消接種科興嘅預約,搞到國貨變賣剩蔗,就連前特首曾蔭權同夫人,今朝去接種嘅都係德國生產、德國BioNTech同中國復星合作嘅「復必泰」疫苗,成為唯一一個唔打科興嘅「領導」。到底要「治港」定「自保」,似乎身體會誠實作答。

公務員事務局局長聶德權今晚喺佢嘅fb出post,除咗上載咗已經76歲嘅曾蔭權去中山紀念公園打「復必泰」嘅相,仲話上星期開始已安排部份屬優先組別嘅人士,先行去7間中心接種,今朝同場嘅仲有6個紀律部隊,包括「忠誠的」警隊、消防、入境、懲教、海關同埋飛行服務隊,以及其他機組人員。

不過有市民喺聶局長個帖文度留言:「香港前線公務員為香港仆心仆命,佢哋應該打國家提供畀香港嘅科興疫苗唔應該用外國疫苗,因為打科興係對香港公務員嘅肯定」。係囉,愛國嚟講呢,應該係由外到內,再由內去返外嘅,容不得半點含糊㗎嘛。

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

一格照片,一個故事,Follow蘋果Instagram!
BannerBanner