隔牆有耳:政協常委吳良好︰國安法勁過車公上上籤(李八方)

更新時間 (HKT): 2021.03.08 02:00
■吳良好發言時話國安法宣佈實施後,好多港人表達興奮心情。

每年北京兩會,都係人大政協嘅「表演」舞台,一場場擦鞋示忠戲不停上演。噚日全國政協召開第二次全體會議,就由全國政協常委、香港福建社團聯會榮譽主席吳良好突圍而出。唔知吳良好係咪活於另一個時空,佢喺大會發言時話,國安法宣佈實施後,好多港人走上街頭「高舉五星紅旗,表達興奮心情」,仲連車公都拉落水,話去車公廟求籤,都唔及國安法呢支上上籤!

「不少人高舉五星旗表達興奮」

佢喺大會發言時話,國安法6月30日宣佈實施後,「從中午到子夜,我和許多香港市民一樣,心情激動。不少人走上街頭高舉五星紅旗,表達興奮心情」,又指國安法實施半年多,市民安全,人心安寧:「6月30日這一天,人們再次流淚,這是激動的淚,是欣慰的淚。」但唔少港人當時見到,港版國安法宣佈實施後翌日,大批港人唔理係咪會俾人拉,上街高叫爭取民主嘅口號;當日確實有唔少人流淚,但只係為港人痛失自由民主同人權而落淚,同吳良好嘅描述差天共地。

好戲更在後頭。吳良好仲話,國安法實施後,香港安定咗,直言:「年初二在車公廟求的籤,也比不上國安法這支上上籤。」重申香港治理者必須熱愛國家、擁護中共,支持修改香港選舉制度,用制度保證愛國者治港,總結時鞋油更足:「我堅信,有習主席和中央的關心支持,有偉大祖國做堅強後盾,有愛國者治港,香港的明天一定會更美好!」

李八方

一格照片,一個故事,Follow蘋果Instagram!
BannerBanner