李八方online︱區選敗部搶閘復活 民主派質疑地政署借橫額位「助攻」

更新時間 (HKT): 2021.03.08 18:21

特區政府點樣全方位打壓民主派,大家「有目共睹」,稍後透過宣誓條例等,肯定又有一批區議員被DQ,透過補選,建制派真係「輸都變贏」;但人未選到,橫額已出爐。東區區議員麥德正話呀,最近見到越嚟越多「區選敗部」橫額周街掛,例如佢就見到港島立法會議員葉劉淑儀近期以「全港社區抗疫連線」名義而非「新民黨」出banner,葉劉大頭旁就係2019年喺西灣河選區敗於麥德正嘅新民黨林梓鴻。

地政署開綠燈 敗部林梓鴻宣傳橫額「攞正牌」

阿正話呀,掛街橫額由地政署審批位置,除咗立法會議員或區議員,地政署一向唔批准其他團體申請橫額位做個人宣傳;就算係非牟利組織申請到橫額位,批准展示期一般唔超過兩個月,橫額違規就會被拆及罰款。但佢見到上述提及嘅橫額,有晒批准號碼兼寫埋展示期長達近4個月。咁佢就打去問地政署,獲回覆話呢個係正式編號。

嘩,即係地政署任意操作,唔使按指引辦事?定係官府協助敗部復活,度身訂做新規則,唔使話你知?阿正話佢已經去信地政署要求解釋,仲見街坊如見到類同橫額,可以聯絡佢哋告知位置。

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

一格照片,一個故事,Follow蘋果Instagram!
BannerBanner