垃圾徵費草案一拖再拖兼設「適應期」 環諮會主席黃遠輝嘆重審嘥時間

更新時間 (HKT): 2021.03.08 21:12
垃圾徵費拖足幾年仍未實施,草案更要於今個立法會年度重審,環諮會主席黃遠輝則嘆「嘥時間」。

去年「胎死腹中」的垃圾徵費草案,早前法案委員會拍板在今個立法年度重新審議。政府建議草案通過後,會先進入12至18個月的「準備期」,再額外提供一段「適應期」。環諮會主席黃遠輝認為需時太久,建議縮短期限,又批評重審法案已浪費過去超過兩年的審議時間,希望今個立法年度內可盡快通過草案。

環諮會今午開會討論垃圾徵費,多名委員提出有關非法棄置、假冒垃圾膠袋、郊野公園垃圾、公眾地方垃圾桶數目等問題。主席黃遠輝傍晚接受《蘋果》訪問時坦言,上屆環諮會早已討論以上問題,「聽唔到邊一點係當時冇觸及,所有諗到嘅問題當時(2018年11月)都討論晒。」當局本來預計,法例通過後會先進入12至18個月的「準備期」,再正式實施垃圾徵費,現時再建議增設「適應期」,惟時限未定。黃遠輝認為兩者皆可縮短,他直言「已經嘥咗兩年幾,再加適應期,就算今屆通過到,真正實施最快都要2023年,重審係走返同樣程序,仲係咪要咁長時間準備?」

被問到認為現屆法案委員會有沒有誠意加快審議進度,黃遠輝及副主席譚鳳儀聞言只輕笑。黃遠輝隨後表示,草案內容無變,所有問題應一早完成討論,但現時仍聽到議員有反對聲音,認為審議進度比預期慢。他仍然期望草案可於今個立法年度內通過,否則下屆再一次重審,只會浪費更多時間。

當局料2024年推膠樽生產者責任制 環諮會批1毫回贈金額過低

會上亦有討論上月開展的膠樽生產者責任制公眾諮詢,環保署副署長(特別項目)陸嘉健承認,諮詢文件未有提及政策時間表,他稱5月底完成諮詢後會整合各方意見,最快2022年將草案提交立法會,希望一年內通過,再與各持份者商討具體安排,最早2024年正式推行。

當局建議市民每交回一個膠樽,即可獲1毫回贈,會上多名委員均認為回贈金額過低,未能鼓勵市民回收膠樽。港大公民社會與治理研究中心副總監羅惠儀表示,現時坊間試行回收,回贈金額介乎5仙至2毫不等,惟成效是「塘水滾塘魚」,只有本身關注環保的小眾參與。她建議回贈金額應提升到5毫至1元,才會令其他市民改變回收習慣。

黃遠輝亦質疑回贈金額過低,「1毫子係咪有足夠誘因,叫人行多幾步,攞個樽去回收?」經營飲食集團的黃傑龍則慨嘆,以金錢而非教育去推動環保是「下策」,「要為1毫畀返個樽 ,而唔係為咗環保,好可悲」。他亦同意相信大部份人不會為1毫改變生活習慣,希望提高金額。

陸嘉健回應指,知悉不少團體都建議提高回贈金額,但現時環保署的入樽機先導計劃亦將回贈金額定於1毫,計劃推出5星期內收到20多萬個膠樽,認為金額已有一定吸引力。

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

一格照片,一個故事,Follow蘋果Instagram!
BannerBanner