隔牆有耳:憶邵逸夫授練腳錦囊 
老董︰仆親好小事(李八方)

更新時間 (HKT): 2021.03.09 02:00

今年八十有三嘅董建華早排打完科興後表現興奮,形容感覺非常好「一啲都冇事」,但七日就喺北京人民大會堂內仆倒。好多人都將呢一仆,同英國首相戴卓爾夫人80年代喺人民大會堂前嘅一仆相提並論,擔心香港命運再坎坷,不過老董話自己身體絕對冇事,仆親只係叉錯腳,又公開已故邵逸夫爵士畀佢嘅「健康錦囊」。

老董噚日同部份傳媒高層茶敍,講返當日喺仆倒事件,話自己「一切安好」,外界毋須反應過大,仲解釋返當日人大開幕儀式結束後,正同人打招呼,冇留意腳下踏空跌親。又話呢件「小事」驚動喺台灣同美國嘅妹妹,對方急致電問候佢狀況。

被問選舉之期 稱病毒難預計

講開仆親,老董話已故邵逸夫爵士係第一個同佢講,自己將來會做特首,老董話佢當時都唔知邵逸夫點解咁講,邵仲私人教路「健康錦囊」,要老董多做運動,教佢每朝喺床上舉腳練力。所以老董自言「腳力好好」,仆親好快企得返起身。

當然老董見部份傳媒高層唔只講仆親,而係推銷北京搞嘅閹割選舉方案,被問到9月能否如期舉行立會換屆選舉,老董話唔使猜測太多,因為病毒一嚟,乜都無法預計,唔知算唔算「預告」政府會再次借疫情押後選舉呢?

老董隻腳一向備受傳媒關注,皆因佢多年前曾經以「腳痛」理由辭職落台,照道理如果97之前已經喜獲錦囊,到2005年下台都練咗8年,都應該久經鍛煉唔會腳痛喇啩。到底係老董有啲老懵懂記錯,抑或一時講錯?

李八方

一格照片,一個故事,Follow蘋果Instagram!
BannerBanner