隔牆有耳:表忠廣告一抵四 
中資能人壓港富商(李八方)

更新時間 (HKT): 2021.03.10 02:00
■中國中信嘅表忠廣告佔全版版位。

早排全國港澳研究會理事田飛龍寫文,話北京要嘅唔係「橡皮圖章或忠誠的廢物」,而係「賢能的愛國者」。唔想俾北京當廢物,先要畀北京睇到夠忠誠,一直有傳北京對香港商界嘅「忠誠」有睇法,咁佢哋自然要用盡方法表忠,好似幾大富商集團噚日就透過《文匯報》同《大公報》登廣告,堅決、全力支持閹割香港選舉制度,不過睇埋兩報處理佢哋同中資廣告嘅分別,就知再「忠誠」都係差一級。

親疏有別 溝淡影響力

其實麗新集團董事會主席林建岳、信和集團主席黃志祥、新鴻基集團主席郭炳聯、香港老牌企業太古公司和國泰航空都已經分別公開表忠,支持中共「完善」選舉制度。口講唔夠,真金白銀落廣告是常識,所以多名本港富商旗下集團噚日就喺《文》、《大》落廣告,分別有李嘉誠出任資深顧問嘅長江集團、大劉妻子陳凱韻(甘比)出任公司行政總裁嘅華人置業集團,仲有新鴻基地產、嘉華集團亦有份登報,四個集團所採用字眼都緊跟大隊,都係話支持全國人大「完善」選舉制度,或者支持確保香港長治久安。

廣告就連排版都充滿政治訊息,堂堂傳統富商集團,一個全版位置都冇,一劏四每人屈就一個角落,講真佢哋點會慳呢啲錢,分明係黨報覺得佢哋嘅地位低,咁邊個可以得到全版廣告待遇呢?當然就係中資企業。邊個先係北京眼中嘅賢能愛國者,意思都非常清楚。好多人話阿爺閹割香港選舉制度,除咗係殺死民主派,亦要溝淡商界於立法會及選委會的影響力,減低商界以往造王者角色,商界真係要睇路喇!

李八方

一格照片,一個故事,Follow蘋果Instagram!
BannerBanner