特首跑馬仔︱何柱國下戰書撼林鄭:唔係為勝選 而係要同佢辯論

更新時間 (HKT): 2021.03.11 13:31

早前成功將《星島日報》賣盤予內房資本的全國政協常委何柱國一直盛傳與特首林鄭不和,早前《蘋果》已披露林鄭若去馬選特首,他會入閘挑機。何柱國今天接受無綫訪問時公開表明考慮選特首,但稱不是為了勝選,而是要與林鄭辯論:「如果林鄭月娥特首出嚟再參選特首,我就會一定出嚟。因為我嘅目的,就係想搵個機會同佢辯論。因為佢嗰時講過一句說話,佢認為佢『建設多過破壞』,我就對呢句說話有啲唔同睇法。所以我想睇吓佢建設咗啲乜嘢。」問及林鄭任內破壞了甚麼時,何拒絕言明,只說:「所以我哋大家辯論囉!」

對於中央決定「完善」香港選舉制度,並會將立法會增至90席,當中由選委會互選的議席佔30或40席。何柱國認為,即使日後選舉委員會再加300人至1,500人,商界的力量也不會攤薄,因為不少政協也是從商。

他又聲稱,較多選委進入立法會可以彰顯「行政主導」:「根據《基本法》行返行政主導,同埋港英政府時間都係行政主導,而且港英行政主導嗰陣,我哋香港好好、經濟好蓬勃,咁你行返20、30、40席,個行政主導就少啲干預嘞。正式嚟講,都係有廣泛代表性㗎喇,你唔好睇政協嗰啲人全部會跟住中央政府投(票)、或者跟住特區政府投(票),因為每人都有每個人嘅理念。」

問到日後選特首、立法會時都可能要獲一定數量選委提名時,何則指,選委會按過往言行考慮對方是否「愛國者」,並稱有關決定屬「個人判斷」,不會有任何來自政府或中央的壓力。

何柱國是香港罕有表態欲出選特首的商界人物,被視為中國國家主席習近平智囊之一的學者鄭永年日前表示,最需要的是「有能力的愛國者」治港,認為「假忠誠」、「光是表一個態」十分簡單,但找出「能人」解決實際問題卻不簡單,直指香港目前的問題是缺少一個找出「能人」的機制,「香港實際上從商界看一看,不缺能人,香港過去幾十年不缺能人,那麼怎麼把他找出來?這個標準我是覺得還是很重要」。

林鄭今日傍晚開記者會時,未有斷言拒絕與何柱國辯論,更說:「我好歡迎同議會同一啲人士談論香港嘅議題,只要大家都係客觀、持一個開放態度,擺事實、講道理,呢個係隨時都可以發生。」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

一格照片,一個故事,Follow蘋果Instagram!
BannerBanner