全面管治權︱首投族杯葛「新選舉」拒做選民 多年選民灰心:全家人杯葛

更新時間 (HKT): 2021.03.11 18:26
人大「閹割」方案通過,有屬首投族的年輕人明言不會投票,但亦有人指自己會「投到嘅就投」。

香港選舉制度從今被顛覆,第十三屆全國人大今日通過《有關完善香港選舉制度的決定草案》,當中決定包括選委會將擴大至1,500人,立法會增至90席等。不過,在全場人大的鼓掌聲背後,醞含香港市民的悲哀。一眾「首投族」認為選舉「唔公平、無意思」,杯葛選舉不會投票,更有年輕人笑言「選民都唔會做」。

全國人大今以2,895票贊成、0票反對、1票棄權通過草案,新華社迅速公佈當中決定有9條條文,包括確保以愛國者為主體的「港人治港」、選委會將擴大至1,500人,成員將包括港區人大、政協委員、全國團體香港代表。立法會將擴展至90席,行政長官要獲最少188名委員聯合提名方能入閘。

「畀屎你揀,咁點揀啫?」

選舉制度徹底改變,一眾「首投族」大感心灰意冷,表明不願投票。就讀工程系一年級的張同學,斷言自己不會投票,或只會投廢票,「都唔公平,投嚟都無意思」。他認為,選舉有多重篩選,「你都篩選晒啲人,好似之前選特首咁,都係畀3嚿屎你揀,咁點揀啫?」

對於地區直選席數屬20還是30席仍未有定案,張認為席數已不再重要,「最終佢都係想革走啲佢唔鍾意嘅人,所以無乜意思,除非真係畀啲代表到我哋嘅人入去囉」。而雙議席單票制,或會令民主派及小型政黨消失於地區直選,張認為是預料之內,「佢而家都咁樣捉晒,佢唔會畀民主派嘅人入去,或者可能真係好保守嗰啲,咁樣都代表唔到我哋。」

「唔會玩佢個遊戲」

就讀浸大的張同學,亦指自己不會投票,「而家咁同架空咗立法會無乜分別,咁我寧願唔投,我唔會玩佢個制度,唔會玩佢個遊戲」。其友人盧同學及劉同學亦表明不會投票,對於地區直選席數減少亦「無所謂」,「一面倒,其實都無乜分別」。劉同學更笑言「唔會做選民」,「無乜意思,都唔使玩落去,而家要『愛國愛港』呀嘛!都清楚個遊戲規則」。

至於雙議席單票制對民主派或更不利,三人認為這是預料之中,「而家有『忠誠反對派』嘛,唔需要再有民主派」,又認為中共活生生剝奪港人自由,「本身佢咁玩法都無計,佢咁樣強硬拎走咗(市民)啲嘢,我哋都做唔到啲咩」。

「盡努力 投到嘅就投」

不過,仍有年輕人打算盡一己之力,守住最後的堡壘。今年20歲的馬先生指,自己會登記做選民,接下來立法會選舉仍會投票,「盡自己努力、盡自己所能,投到嘅就投」。被問到會否認為投票變相認同制度,馬無奈指「咁佢呢個制度出咗,我哋都無得揀」,亦坦言現時選舉的作用比以往減低。他希望地區直選可有至少30席,「多啲選擇,咁個形勢可以唔同啲」。

同樣是「首投族」、20歲的胡小姐,則表示會視乎候選人才決定是否投票,「要睇吓有咩人參選,同埋佢哋參唔參選到先。」她亦希望地區直選可有30席,「地區多啲會好啲啩」,但認為民主派聲音會被逐漸消失,「感覺上個標準已經唔客觀,我都諗緊可能有好多人參選唔到,就畀佢好主觀咁ban(禁止參選)晒佢」。

「京官治港,唔會再投票」

至於一向有投票的市民,似乎與年輕人一樣,對選舉大感灰心。現年55歲的鄭先生是多年選民,多屆立法會亦有投票,但表明往後日子「唔會投票,全家人都唔會」。

鄭指,現時顛覆制度明顯是「京官治港」,「上面(大陸)嘅人只係着重食、瞓、工作、死,但最重要嘅自由佢哋係唔會理,咩言論自由、出版自由、集會自由嗰啲」。鄭無奈指,港人並沒有選擇權,「我哋而家喺人哋嘅屋簷下,人哋話點做就要點做」,亦認為沒可能達到港人治港。

對於地區直選席數,鄭直言「無用㗎,幾多席都係無用,因為全部都會係『保皇黨』、『民賤聯』嗰班友⋯⋯民主黨?一陣又話你宣誓唔得、參與過咩運動,好多樣嘢、好多門檻,根本你入唔到議會」。談到做了多年選民,是否認為這次改革屬大倒退,「倒退又好,前進又好啦,都唔到我哋話事,而家全部都係京官話事」。

「仲投得啲乜呀而家?我唔知投得啲乜嘢」

以往同樣有間中投票的盧先生,則指不明白現時投票的意義,「仲投得啲乜呀而家?我唔知投得啲乜嘢」,認為即使投票都未能選出心儀代表。

盧認為,地區直選席數多少,並未能改變香港現況,「你睇到政府㗎嘛,你睇到政府喺度做緊乜嘢,總之點都會將一啲事情拉平咗佢,有啲嘢(草案)過唔到你就永遠都唔會過到,所以投嚟無乜用」。對於民主派或會消失於議會,盧坦言自己認同已不需要有民主派進入議會,「由佢啦,建制派覺得佢哋喺裏面,香港就有救喇,咁咪畀佢救囉」。

被問到現時選舉制度大倒退,會否感到唏噓?盧指,自己以往投票是希望向政府反映自己的意見,「但政府見到咁嘅立場,都可以用盡好多方法去化解市民嘅意見,化解市民嘅傾向,所以今時今日真係無嘢好講,仲要定埋《國安法》」,指現時香港人或只會放心力思考會否離開香港定居。

新選舉制度如人大做舉手機器

楊先生與女友同樣為選民,以往三至四屆立法會均有投票。被問到接下來立法會選舉會否投票,楊先生馬上回答「都唔知投嚟做乜」,形容新選舉制度有如全國人大,「其實都係想大家做個舉手機器,扮咩選舉,好似今日(人大)咁,都係100%贊成㗎!你都改到個遊戲規則就晒你囉」。其女友則指,於她而言「點改都一樣」,席數多少亦沒分別,「全部都係你嘅人,你鍾意點就點啦」。

兩人指,會視乎候選人才決定是否投票,「如果得返民建聯同新民黨,再加埋啲假獨立議員,咁就真係唔知點投」。不過,他們坦言對選舉不感期望,亦不會有很強投票意欲,「第時(議會內)投『反對』都犯《國安法》啦,你阻撓佢發展呀嘛!」。

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

一格照片,一個故事,Follow蘋果Instagram!
BannerBanner