隔牆有耳:團體成功爭取 蒜汁有蒜味 
踢走監房劣食概念汁(李八方)

更新時間 (HKT): 2021.03.11 02:00

手機用戶請按此放大圖表

過去好多關心監房伙食嘅團體,批評監房食物質素差,一來份量少,二來營養差,三來味道壞,四來款式千載不變,好似飯嘅汁咁,曾經有文章話啲汁只係個「概念」,有色但無味,囚權組織石牆花噚日喺fb出文,話情況終於有改變,最少蒜茸汁終於真係有蒜茸味!

「只要有恒心,赤柱磨成針」

石牆花喺fb出文話,正所謂「只要有恒心,赤柱都磨成針」,佢哋話質素為人所詬病嘅監房菜單,終於有所改變,雖然都仲係每星期「都是豬牛雞豬牛雞牛丸」,但起碼雞肉已經由雞胸肉改為雞片、好難食嘅池魚又改為炸魚柳,雖然只有兩塊乒乓波咁上下大細,而且星期六仲有豬頭肉,仲話聽講味道唔錯!而最緊要係連個飯汁都有改善,最少係蒜茸汁真係有蒜茸味。石牆花小編語重心長話:「民以食為天,在囚人士一樣。」

講開石牆花,原來佢哋為支援被「未審先坐」嘅手足,已經迅速「轉型」做貨倉,石牆花小編話,原本12月中啟用時只得兩個層架裝貨,𠵱家已經變成六個,仲話佢哋係買晒間舖頭所有嘅層架存貨,而佢哋同本土零食網店Jimmy Jungle嘅合作亦更加緊密,𠵱家每星期執一次貨,全力支援在囚手足和家屬,仲係費用全免。小編話佢哋其實可以做嘅唔多,只希望呢個「在囚人士物資資源中心」,能夠減輕在囚手足同家屬一啲負擔。

李八方

一格照片,一個故事,Follow蘋果Instagram!
BannerBanner