隔牆有耳:林卓廷還柙 堅持唔叫私飯(李八方)

更新時間 (HKT): 2021.03.12 02:00

八方噚日講過監獄皇家飯質素終於有改善,但其實好多未被定罪嘅還柙人士,係可以唔食皇家飯,佢哋有權選擇向持有合法牌照嘅食物供應商,購買自己嘅餐膳,即俗稱食私飯,質素同選擇當然更好更多,而被扣押嘅民主派初選人士入面,有人叫私飯食,亦有人好似民主黨林卓廷(圖)咁,堅持唔叫私飯。

阿廷fb小編日前出po,話原本由阿廷還柙開始,就幫佢張羅私飯,希望佢喺入面可以食好啲,點知阿廷非常堅持唔使幫佢破費申請,因為佢會慢慢慣入面嘅膳食。

咁入面還柙人士嘅皇家飯質素又如何呢?阿廷fb小編引述阿廷佢形容,每餐隻碟都有三細格,一格菜、一格肉、一格飯,不過啲菜同肉明顯係白烚嘅,好彩阿廷平時食得清淡,所以覺得無乜所謂,仲話咁樣食都幾健康。

從容面對一切

小編又話成日都聽人講,監獄入面啲飯無色無味,所以唔知阿廷係想佢哋唔好擔心先咁講,定真係食得落,不過小編見到佢尚算可以從容面對一切,都真係令佢哋安心咗啲嘅。最後小編不忘呼籲,現值艱難時刻,阿廷仲身負多宗案件,希望市可以換個方式繼續挺起阿廷,包括去阿廷Patreon:https://www.patreon.com/cheuktinglam 課金,或者去Youtube 訂閱阿廷個Channel 「林卓廷Table TV」。

李八方

一格照片,一個故事,Follow蘋果Instagram!
BannerBanner