7.28暴動案 警署警長繪畫出錯 不認不認還須認

更新時間 (HKT): 2021.03.12 17:59
警署警長伍國雄
(蘋果日報)

前年7⽉28⽇⽰威者與警⽅在上環爆發激烈衝突,23人被控暴動,案件續審。拘捕本案第四被告的警員供稱,第一眼見到被告時,對方已躺在地上,警員並應法官要求,在地圖上畫出「火柴人」,顯示被告遭制服時的方向。惟今日辯方播放現場片段時,發現警員在地圖上畫的「火柴人」方向錯誤。

當日身為速龍成員、現時駐守機動部隊訓練隊的警署警長伍國雄繼續作供。伍昨供稱,案發當日在西區警署附近向東推進,其間前面有示威者堵路,他更曾被石頭打中腳部三次。其後警方快速推進,試圖驅散及拘捕前面的示威者。伍供稱他以最快步速跑到皇后街,「見到有個人瞓咗喺度,於是我就上去處理佢」。

伍又指,該人頭戴的黑色頭盔的款式「好特別」,「好似警員同護衞員用嘅防彈頭盔款式」,並有眼罩、口罩、黑色短袖衫、長褲及手袖。伍當時將男子反轉面向地,並將其雙手放在後面,用膠索帶套住雙手,其後軍裝同事到場增援。

伍又稱看見該人時「頭向德輔道西」。法官陳仲衡提議他在地圖上畫出「火柴人」,以顯示該人頭及腳的方向。在辯方大律師石書銘盤問下,伍重提第一眼看見第四被告徐慶鈞(20歲),被告先是「面向天」躺在地上,其後才轉身「面向地」,並指他當時「頭向電車路,腳向西環」。

警:我好清楚睇一睇個頭望向邊度

惟石大狀指出,伍昨在地圖上畫出的被告方位是「頭向南、腳向北」,法官亦問「我都唔係好明」。伍堅稱被告當時頭向電車路,「我當日去處理時,我好清楚睇一睇個頭望向邊度,我仲睇一睇當時個位置喺邊」。

陳官聞言稱:「咁個頭咪唔係向住中環囉?」其後伍回應謂:「如果律師先生你張圖係向北,我同意你咁講,佢係頭係向南。」石大狀稱:「係你畫張圖不準確呀!你將被告嘅方向畫錯。」伍終同意謂:「根據片段畫面顯示被告被捕情況,我同意我畫錯。」

伍又同意當日衝前拘捕時情況快速兼混亂。辯方遂指出:「當時實際發生咩事嘅細節,到今日記錯咗都有可能啦吓嘛?實際上有同你描述有誤差,都有可能啦?」伍卻不同意。

石大狀又問伍,驅散時是否有特定的人追捕。伍謂:「我哋冇指示係指定拉一個人,例如我唔係一定要拉石先生,我哋係拉一啲前面非法集結的示威者。」石大狀稱:「當然唔係話你捉記者、捉路人。我嘅意思係,示威者入面捉到邊個就邊個嘞,啱唔啱?」伍同意。

另外,當日協助被告的防暴警員21283葉桂堯供稱,當晚7時推進到案發地點,看見第四被告「左右郁動,試圖反抗」,遂上前協助同事,用單膝跪在被告下背位置制服。控方播放當日新聞片段顯示,包括第四被告在內的兩名男子遭多名警員壓在地上,有警員粗暴撥下第四被告的頭盔及護目鏡,又扯走第四被告與另一男子的口罩。審訊繼續。

【案件編號:DCCC871/19】

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

一格照片,一個故事,Follow蘋果Instagram!
BannerBanner