業界狠批 促索詳細報價自保

更新時間 (HKT): 2021.03.14 02:00
■通渠專家指廚餘及油份會導致鋅盆淤塞,可每日倒熱水分解油份。

【本報訊】有市民廚房鋅盆渠淤塞,在網上找通渠公司通渠卻被收取天價9,600元通渠費,質疑被騙。有10年經驗的通渠師傅李先生指9,600元的確收費過高,狠批涉事兩名師傅手法「低莊」,建議市民施工前向通渠師傅問清楚所用方法及收費細則,並要對方詳列每項維修費用。

消委會近年接69宗投訴

李師傅指,鋅盆污水會由屋內渠流至公用「大喉」,若然真的「塞到出面條渠」,可使用長達20米的高壓槍通渠,收費介乎1,000至3,000元;若高壓槍無效便要在外牆搭棚通渠,搭棚費6,000元起,通渠費2,000元,工程約兩小時。他補充,更換一條新的鋅盆渠約需一萬元,收費「9,600蚊不如換咗條渠啦」。

香港管綫專業學會前會長黃敬坦言業內難免良莠不齊,直言今次事件「尷尬」, 因事主父母自願付費,「有人同意咗……錢畀咗亦都係承諾嘅一部份」。

消委會指,由2018年至2021年1月共收到69宗涉及通渠投訴,涉款逾80萬元,當中涉及銷售手法及收費問題。業界建議市民光顧通渠公司前應自行格價,施工前要通渠師傅詳列維修費用清單及事項,最理想是找相熟師傅維修。平日亦要預防渠管淤塞,如廚房鋅盆渠淤塞一般由廚餘和油份所致,可放隔渣器隔走廚餘,日常也可倒入熱水溶解油份;而市民可定時清洗在鋅盆底的U形隔氣管,減少塞渠風險。

一格照片,一個故事,Follow蘋果Instagram!
BannerBanner