寫給47人的家書︱岑敖暉,我仲爭你一餐飯!

更新時間 (HKT): 2021.03.15 06:09

47名民主派因參加初選被控違反《國安法》下的串謀顛覆政權罪,至今有8人,包括劉偉聰、呂智恆、楊雪盈、林景楠、黃碧雲、鄭達鴻、柯耀林、彭卓棋獲准保釋。不見天日的歲月,或者很漫長,《蘋果》邀請牆外的人,將思念化為家書,默默向被囚或者打氣。

岑仔:

2014年識你嘅時候,大家都2字頭,嚟到今日我都就嚟三張,個仔都兩歲,而你就被囚無自由。

記得一次大圍街站,你仲未被《國安法》拘捕,我哋討論到去留問題。你話我有小朋友應該走,而你(當時仍然係未結婚嘅)無牽無掛,會選擇留低。為咗香港可以去到幾盡?相信你用行動已經證明咗。

就正如我當時講,「香港要人」,人人都走,仲有邊個會留?我唔止要留,仲要生兒育女,培養一班真正愛港嘅人。喺大家都身陷獄中嘅時候,我同大家都會盡力令香港唔好壞得咁快。

之前講過,「你咁窮,要請你食飯」,飯都未食,你就入咗去,等你出返嚟「阿姨」請你飲酒食飯打邊爐(唔係用Uncle Jimmy啲錢),好好保重,期待再見嘅一日,我會留喺香港等你哋出嚟。

靚媽

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

一格照片,一個故事,Follow蘋果Instagram!
BannerBanner