47民主派被控︱獄中閱讀成慰藉 岑子杰盼外界看夕陽時想起他

更新時間 (HKT): 2021.03.15 19:00

47人因組織或參與民主派初選,被控串謀顛覆國家政權,其中四人今日上庭就保釋覆核應訊。在荔枝角收押所,繼續有親友前來探望仍被扣柙的人。岑子杰的友人、作家鄧小樺形容岑已能適應在收押所的生活,又會趁「放風」時欣賞日落,希望在外的人看到日落時會想起他。

岑子杰望向外界傳達自己「冇事」

鄧小樺探望岑子杰後,稱他已能調整自己適應在內的生活,又與朋友頻頻通信。為岑準備獄中書單的她稱今日帶了法國哲學家福柯的《規範與懲罰: 監獄的誕生》:「(岑)睇書睇得好開心,話如果唔係入咗嚟都無可能睇咁多書。」她稱岑希望向外界傳遞「佢冇事,佢處理到依件事嘅精神」。

被問到岑子杰有否分享生活點滴,鄧笑稱「佢啲趣事好多都三級㗎,唔方便引述喇!」又稱岑向她表示自己在「放風」時間平靜地欣賞和感受日落,「話大家見到日落嘅時候就諗吓佢……你話佢係咪浪漫得好離譜!」

劉頴匡憂保釋覆核者:希望佢哋唔使返嚟喇

劉頴匡女友黃于喬(Emilia)今日亦如常到訪,與沙田區議員陳運通同行。她稱劉「肉體ok,心理唔可以expect好好」,為自己和其他人的案件擔憂,提及今日上庭的四人時向她表示「希望佢哋唔使返嚟喇。」

她笑稱劉讀報時會「汁都撈埋」,連報紙邊緣的小字也細讀;又無奈指劉早前未有留意到她從短髮駁成了長髮,今日卻留意到同行的陳運通的髮型變化:「(陳)剪咗少少咋,佢竟然一嚟就話喂你剪咗頭髮喎!」

王百羽獄中仍關心戰友

元朗區議員巫啟航及陳思雅則到場探望王百羽。巫稱王在收押所多看小說,亦關心近日案中戰友的情況,自己亦已將今日上庭四人的部份保釋結果告知,王認為屬意料之內。

沙田區議員黃文萱、容溟舟亦前往探望前黨友楊岳橋,離開時婉拒訪問,僅稱楊「精神好」。油尖旺區議員林兆彬則稱自己前來探望其他在囚手足,其間有與一眾初選被捕者簡單打招呼,稱眾人均面帶笑容。

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

一格照片,一個故事,Follow蘋果Instagram!
BannerBanner