47民主派被控︱譚文豪錄音向港人暫別:唔使擔心我,我會好好適應牆內生活

更新時間 (HKT): 2021.03.15 01:47

47人因參與民主派初選而被控串謀顛覆國家政權案,其中本獲准保釋的譚文豪,因律政司「追殺」要求覆核保釋決定,上周在覆核申請中被《國安法》指定法官杜麗冰拒絕保釋,須繼續還柙至5月31日再應訊。譚步入拘留室前,依依不捨地望着妻子及至親,輕拍胸口,神情無奈;妻子亦輕拍心口,並握拳回應作鼓勵。待譚文豪步入拘留室後,妻子終於難掩傷心,掩面痛哭。

「我好快可以出嚟送外賣俾大家」

譚文豪與妻子及一對仔女團圓之日或許暫未有期,惟譚與港人暫別,日子早定於2月28日、往警署報到前數小時。其開設食肆「一日三餐」周日(14日)晚上載譚文豪28日往警署報到前的錄音,題為「譚文豪與香港人暫別」。畫面片段是譚一幅幅工作照。

飛機師空降茶餐廳,人生換了跑道,如今,譚又換了另一條跑道,不甘不願不服,但他向大家承諾,「一日三餐」由抹枱落單的小伙記、廚房佬、水吧部以至洗碗姐姐,會如常為大家服務。「當然肥仔仍然會咁肥⋯⋯」。

一切一切都會運作如常。譚說。「大家唔使擔心我,我會好好適應牆內嘅生活,希望大家繼續支持『一日三餐』,我好快可以出嚟送外賣俾大家! 」

譚文豪錄音全文:

「各位熱愛香港嘅同路人,我係譚文豪。

相信大家睇到新聞都知道,我因為《國安法》而被還押,短期內呢都唔能夠同大家見面。所以預先錄定音,答謝大家嘅支持。

未來呢有一段時間我唔會可以喺『一日三餐』同大家打招呼,或者係幫你抹枱幫你落單,但係我相信廚房嘅同事仍然係會花心思煮好每一道菜、水吧嘅同事仍然係會好落力咁樣沖好每一杯奶茶、樓面嘅同事仍然都會努力斟茶遞水、洗碗姐姐呢仍然都係會省到啲碗碟立立令,當然肥仔仍然會咁肥⋯⋯一切一切都會運作如常。我相信、亦好信任『一日三餐』嘅團隊依然會提供高質素嘅服務俾大家。

最後,大家唔使擔心我,我會好好適應牆內嘅生活,希望大家繼續支持『一日三餐』,我好快可以出嚟送外賣俾大家! 」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

一格照片,一個故事,Follow蘋果Instagram!
BannerBanner