隔牆有耳:口說科興得 身體很誠實 
中大醫學院猛人 揀打「猛一啲」(李八方)

更新時間 (HKT): 2021.03.15 02:00

手機用戶請按此放大圖表

武肺疫苗上月26日開始接種,德國BioNTech研發嘅復必泰疫苗亦已於本月10日開打,但政府力谷嘅國產科興,至今有六人在接種後死亡。

許樹昌曾拒答打邊隻

上月疫苗顧問專家委員會以「效益大於風險」為由為科興開綠燈,之前有記者問過許樹昌會唔會打科興,許話「私人問題唔好答,唔應該將呢啲問題政治化」,到日前許同中大醫學院院長陳家亮等多位教授去中大醫院打疫苗,許樹昌打邊隻終於揭盅,咁就梗唔係許話「效益大於風險」嘅科興,而係BioNTech,難怪又有網民揶揄「把口話科興得,身體卻很誠實」!

雖然政府不斷話科興好,又話長者打科興冇問題,但睇返醫學界好多名人,除咗64歲港大微生物學系講座教授袁國勇揀接種藥力猛一啲嘅BioNTech,踏入90歲嘅港大內科學系榮休教授、醫學界元老級人物楊紫芝、醫管局前主席梁智仁等,早排都去咗打BioNTech。

中大醫學院院長陳家亮日前為鼓勵市民接種疫苗,亦帶住一班醫生去打,包括腫瘤學系系主任莫樹錦教授、醫學院助理院長(校友事務)容樹恒教授,當然仲有內科及藥物治療學系系主任許樹昌教授。咁中大醫院可以接種邊種疫苗呢?答案係:BioNTech,網民揶揄班專家講到科興幾好都冇用,連自己都唔打,你點叫市民信科興係正嘢?

李八方

一格照片,一個故事,Follow蘋果Instagram!
BannerBanner