李八方online︱傳城大改校名 「南洋大學」「華南大學」係大熱?

更新時間 (HKT): 2021.03.15 21:03
八方聽聞城大近排都討論改校名。不過,有傳建議校名大熱係「南洋大學」同「華南大學」,聽落好似有啲另類喎。

所謂「唔怕生壞命,最怕改錯名」,唔少人甚至機構為咗趨吉避凶,久唔久都會改名希望轉運或者改善形象。好似早排公開大學咁,宣佈改名做都會大學後隨即引嚟唔少市民討論。向來重視形象工程嘅城市大學,唔知係擔心公大改名後同城大校名太似,抑或係另有大計,八方聽聞城大近排都討論改校名噃。不過,有傳建議校名大熱係「南洋大學」同「華南大學」,聽落好似有啲另類喎。

城大學生媒體《城市廣播》早排報道,工程學院教授謝旻日前喺教務會上,指城大呢個校名限制學校發展,建議改校名。報道仲話,唔少教授對改校名一事反應熱烈,席間仲提出咗「南洋大學」同「華南大學」兩個建議新校名。據聞校長郭位喺總結時,都話會返去研究吓。

城大回覆八方嘅查詢就話,近年唔少教授都有「強烈聲音」,認為目前校名反映唔到學校嘅學術與科研成果,建議要改校名。校方亦話,改校名一事現時冇定案,學務副校長會從長計議並且同其他持份者保持溝通。

咁最受改校名影響嘅同學仔又點睇呢?城大學生會署理會長林穎曦(Matthew) 同八方講,改校名呢件事唔單止係學術層面,仲涉及學校發展,本來應該拎上校董會討論,但係突然有教授喺教務會上提出,而且有唔少討論,相信成件事背後唔係咁簡單。Matthew又話,學生會同佢本人都對改校名有保留,認為校方做決定前應該諮詢咗同學意見先,佢亦都會喺校董會上提出。

Matthew又同八方講,城大成日都話要國際化,但新加坡一早已經有南洋大學,認為改名叫「南洋大學」只會畀人覺得城大有樣學樣。至於「華南大學」喇喎,Matthew就笑笑口話,聽到「華南」兩個字,淨係諗到「華南海鮮市場」啊。另外,聽聞研究生都非常反對改校名,認為會影響同學第時搵工咁話喎。八方就覺得,改校名影響深遠,城大不如學吓公大咁,公開收集市民意見,話唔定當中有比呢兩個校名更好嘅提議喎。

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

一格照片,一個故事,Follow蘋果Instagram!
BannerBanner