隔牆有耳:愛國醫生八成潛水 唔撐人大閹選舉?(李八方)

更新時間 (HKT): 2021.03.15 02:00
■愛國醫生喺親中報章登廣告,話要「完善制度再上路」,但聯署名單僅百多人。互聯網

北京正式「完結」香港選舉制度,過去呢個星期喺香港多處街頭見到唔少「忠誠的廢物」收集簽名,話要撐全國人大決定喎,仲有唔少777班子高官現身支持,堂堂中華人民共和國最高國家權力機關做決定要呢班人撐?不過,人大今次閹割香港選舉乜唔係得到廣泛支持咩?好似上星期五,有班藍絲醫生喺親中報章登廣告,話要「完善制度再上路」,當中有唔少熟口熟面嘅名,好似李國章、高永文、潘佩璆、林哲玄、周伯展等等,但有網民發現只得百二人多啲,仲少過上次藍絲醫生登撐警廣告。

少過撐警廣告

「No Stake醫學生」fb專頁數過名單,竟然只得百二人多啲,仲話雖然字體已經放到好大,但都填唔滿全版廣告,於是就「聰明」地諗到可以加埋「暨南大學同學會」、「中山醫科大學校友會」、「政府軍部醫院華員職工會」入去填位。「No Stake醫學生」話2019年嘅撐警聯署有500位醫生,反問「唔知點解今次聯署少咁多人?好失望,點解大家愛國嘅熱誠咁唔堅定」,而前線科技人員都關注呢份藍絲醫生廣告,話香港有成萬幾個醫生,但「得百幾個愛國」,仲話唔怪之要引入非本地醫生。

李八方

一格照片,一個故事,Follow蘋果Instagram!
BannerBanner