疫苗接種︱80後憂副作用拒預約打針:有得去日本必會打

更新時間 (HKT): 2021.03.15 21:20

政府今日(15日)公佈擴大優先接種組別,除30至59歲人士人士之外,同時亦增加16歲或以上留學生及家庭傭工2個組別,他們可以明日起預約接種疫苗。有屬於30至59歲群組的市民表示,因擔心疫苗副作用,未考慮預約接種疫苗,「都係睇定啲先」。

屬於30至59歲組別的胡先生表示,近日已有數個接種科興疫苗死亡、面癱等個案,坦言感到擔心,「都係睇定啲先(接種疫苗)」。他稱,政府擴大優先接種組別是想更多市民接種疫苗,「見高危群組60歲以上咁多事故,所以想多啲後生啲,冇咁多副作用嘅人打」。他續說,政府沒有需要高危群組先接種,「正常30至50歲打先」。對於食衞局局長陳肇始曾稱疫苗接種或是未來放寬出入境的關鍵,被問到會否為去旅行打疫苗,他則稱,明白長遠都要接種疫苗,屬全球趨勢,惟不會因想去旅行而打疫苗,「呢個係個人健康問題」。

「對政府一定係冇信心」

同樣屬於30至59歲組別的張先生表示,擔心疫苗副作用,直言:「邊隻(疫苗)都唔打住。」被問到政府是否因為太少人接種,所以放寬優先接種組別,他相信政府會有相關政治考慮,「對政府一定係冇信心」。

另一屬於30至59歲組別的雷先生表示,始終會有接種疫苗後的死亡個案,暫時不會考慮接種疫苗,「佢(政府)話科學上無關,但我情感上覺得有關,所以過唔到情感嗰關」。他認為,政府專家應多加解釋,提供更多數據釋除公眾疑慮,「你只係話無關,說服唔到我哋呢啲人」。被問到會否為去旅行打疫苗,他笑稱,要視乎國家,「如果去日本,我一定會打(疫苗)」。

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

一格照片,一個故事,Follow蘋果Instagram!
BannerBanner