隔牆有耳:「唔揪得」上電台 一激跳掣(李八方)

更新時間 (HKT): 2021.03.16 02:00
■喺節目俾區家麟問多兩問,吳秋北發爛渣大罵「港台咩立場」。

閹割選舉在即,北京做場大龍鳳扮聽「民意」,愛國陣營個個唱好閹割,要突圍唔易。葉國謙鬧田飛龍「廢柴學者」成功彈出,工聯會頭目吳秋北就一味靠左,提出立法會選委議席過半去到50席,傍晚佢出席電台節目,主持人區家麟問佢,成日話「穩定的選舉」,係咪要事先知道選舉結果?俾區家麟咁問,如果吳秋北係賢能愛國者,理應大條道理反駁,點知佢發老脾,大鬧區「你𠵱家咩態度㗎?你係咪真係做節目㗎你?」盡顯「唔揪得」一面。

鬧區家麟「咩態度」

事緣吳秋北上咗《自由風自由phone》節目,大讚自己提出方案,仲話50席符合人大講嘅「較大比例」,如果將勞工界席位擴大,更加「相對平衡」。區家麟就問,其實打工仔唔使靠功能組別投票,喺直選一人一票都可以表達聲音,使乜呢個方案?吳就死撐直選嘅「偶然性、穩定性」冇咁好,咁區再追問,選舉就係不穩定㗎啦,吳秋北口中「穩定」係咪要預知結果?呢一下吳秋北即時跳掣,大鬧區家麟「你𠵱家咩態度㗎?」「香港電台係咩立場㗎?」最後區打完場,話只係提出問題畀吳秋北答。

如果呢條問題係問曾鈺成,八方相信一定駁到區家麟,唔使發爛渣,不過吳秋北又唔需要發脾氣,反正《基本法》話改就改,其實全部議席委任都得㗎,你鍾意你開心就得,何必發爛渣?

李八方

一格照片,一個故事,Follow蘋果Instagram!
BannerBanner