學者斥港府放縱4巴「獅子開大口」 團體質疑暗助港鐵

更新時間 (HKT): 2021.03.16 21:11

行政會議通過4間專營巴士營辦商下月4日起加價,加幅最多達12%。民間監管公共事務聯委會發言人蔡耀昌批評,政府在逆市中批准巴士加價,對小市民而言絕對不合理,現時失業率高企,「學羅致光咁講,失業率都要去5%或以下都要幾年啦」,加上在疫情下,小市民的薪酬不但沒有增長,甚至有下調趨勢,「我諗任何大型交通工具加價,都必然會對市民嚟講係百上加斤」。

蔡指,雖然巴士經營的確有困難,亦理解有加價的需要,但批評政府的政策經常偏袒港鐵,如港鐵可向乘客提供八折車費扣減,「啲資助如果唔係咁唔平均,情況唔會咁嚴重」。不過,他亦提出,港鐵的八折車費原定只實施到本月31日,而巴士加價將於下月4日實施,「港鐵個折扣完,其實佢都係變相加咗價,但而家政府就畀巴士公司加價,咁其實係咪又幫緊港鐵?咁樣反而港鐵(價錢)冇咁高喎!」質疑政府的動機仍然是幫助港鐵營運。

「基層市民小數怕長計」

美國克林信大學經濟系副教授徐家健指,巴士加價於做生意角度問題不大,但對小市民而言就「觀感好差」。他指,部份巴士公司聲稱,自己多年沒有加價,「但你一路唔加,喺個市失業率咁高、經濟環境咁差嘅時候先嚟加,呢個真係唔係一件好聰明嘅事嚟」。他認為,雖然部份車費可能加不多於1元,「但對於基層市民嚟講,小數怕長計,都係一條數嚟嘅」。

徐家健續指,即使政府將交通補貼計劃的每月交通水平的200元門檻,延至今年12月31日,但認為補貼並不是長遠措施,「你唔係永遠㗎嘛,同埋你補貼都係公帑錢,政府又講到自己咁窮,又話要加印花稅呢樣嗰樣」,最終小市民仍需承受加價的壓力。

他亦認為,政府不應依照巴士公司申請的加幅批准加價,任由公司「獅子開大口」,「雖然巴士條數都真係唔係特別靚嘅,但應該要撳佢少少囉」。

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

一格照片,一個故事,Follow蘋果Instagram!
BannerBanner