官曾斥控方「唔知係咪真搞錯」

更新時間 (HKT): 2021.03.17 02:00
■主控官周天行處理本案手法屢受法官批評。

【本報訊】案件開審時,法官葉佐文已曾多次對控方處理本案的手法表不滿,包括辨認被告的書面證供出錯、控方未看醫療報告便憑證人一面之詞撮寫事主傷勢等,法官揶揄謂「辯方開心之餘,都唔知你(控方)係真搞錯吖,定係其他原因搞錯」;並揭發警方索取受害人醫療報告逾14個月,仍未發現醫院「畀錯」報告,質疑警方根本從沒查看。

轟年半不知醫療報告出錯

控方最初一份案情對於本案11名受傷事主的傷勢,僅以寥寥約20字概括描述。法官葉佐文主動問及傷者情況,問控方能否提供更多資料;主控官周天行交代時,其中一人的醫療報告註明為「待取」。

葉官驚訝問:「(案發)年幾都未有醫療報告?」周解釋,醫院在案發當年年底「畀錯」一份似乎與案無關、日期為案發後三個月的醫療報告,警方同年收到後未有發現問題,近日才知悉。葉官質疑控方和警方「呢一年幾做過啲乜呀?(報告)放咗落雪櫃呀?個file凍結咗年半呀?」周承認警方漏看。

周亦在葉官追問下承認沒看醫療報告、只據證人書面口供撮寫傷勢。葉官再斥責:「你當啲證人自己係醫生呀?得唔得呀咁樣?」葉官明言要知道傷者有否縫針及有否後遺症等,因可能與判刑有關。至於警員認人證供有混淆,葉官揶揄謂:「認到乜被告都亂晒,辯方開心之餘,都唔知你係真搞錯吖,定係其他原因搞錯。」指不應出現如此低級錯誤。

一格照片,一個故事,Follow蘋果Instagram!
BannerBanner