隔牆有耳:田飛龍再插忠誠廢物係現象(李八方)

更新時間 (HKT): 2021.03.17 02:00

中共護法田飛龍嘅「忠誠廢物」論同民建聯葉國謙嘅「廢柴學者」論成為政圈花生,噚晚田飛龍接受「眾新聞」中國組同浸大新聞系平台BNN訪問,回應葉國謙鬧佢廢柴學者,話葉國謙嘅言論情緒化、低端、低水平,仲踩多兩腳話「忠誠廢物」唔係針對個別人士,而係「一種現象」,即係暗示成個建制派都係忠誠廢物?仲講明畀兩條路「廢物」揀,唔改進就唔該走人,場火真係越燒越旺。

話唔改進就要退休

田飛龍喺訪問入面拳拳打到應,記者問立法會有冇橡皮圖章,佢就話建制雖然配合中央同港府,但欠政治表現同能力,新制度下佢哋已經唔夠。佢冇統計過議會入面忠誠廢物佔幾多,但揚言忠誠廢物最終會出局,面前只有兩條路,一係將「忠誠」同「賢能」結合改進自己,一係提早退休讓位。

好多網民食足成晚花生,原來唔係針對建制嘅任何人,而係建制所有人,仲問如果要命名呢個現象,係咪要叫「建廢派現象」?八方覺得田飛龍咁樣撩交打,叫呢幾日同港澳辦見面嘅人情何以堪呢?到底葉國謙有咩回應,係改進定提早退休?八方真係非常期待囉。

李八方

一格照片,一個故事,Follow蘋果Instagram!
BannerBanner