隔牆有耳:怕激嬲「另一個人」
曾鈺成唔敢賭777連任(李八方)

更新時間 (HKT): 2021.03.17 02:00

手機用戶請按此放大圖表

唔少建制派呢期都被人覺得同「忠誠廢物」劃上等號,有啲仲自己爭取對號入座,但以下呢個人就冇咩人會形容佢廢,反而周不時被佢扮開明呃到。八方講緊嘅係民建聯創黨主席曾鈺成,佢噚日去咗白鴿黨前主席卿姐個「主場」受訪,然後仲被在場記者問佢點睇林鄭月娥連任特首嘅可能,曾鈺成自爆原來777嘅政治生命,同佢喺朋友之間嘅「賭局」有關,仲話唔敢再賭777連任,因為怕激嬲「一個人」。

卿姐:哦,梁振英

曾鈺成係「愛國者」應該冇人懷疑,所以過去兩屆都傳佢可能挑戰689或者777,但最終唔係被逼退就被勸退。佢就有自知自明啦,噚日表明無意參選,然後就話「唔識估」777會唔會連任,仲話近兩年同朋友就政局發展不時「輸賭」,「最初係有人賭2020年3月林鄭就要下台;之後就輸賭會唔會做多過2020年7月;𠵱家就輸賭佢連唔連任」,但「同親朋友做呢啲政治輸賭我多數都輸」、「眼鏡跌到爛晒」。現實係777一直冇落台,言下之意,唔通佢係一直睇淡、甚至睇死777「命不久矣」?

一直喺旁邊聽到嘆晒氣仲戥香港人唔抵、話香港人「真係慘」嘅卿姐,呢個時候加把口問:「咁你賭唔賭(林鄭連任)呀?」曾鈺成笑住話「無謂再一次激嬲阿林太啦」,仲解釋「我話佢唔連任,就激嬲林太,我話佢連任,又激嬲另一個人」,所以目前都係不作評論。咁究竟另一個係邊位?曾鈺成冇揭曉答案,但卿姐即時爆響口「哦,梁振英」,特首跑馬仔大賽,似乎已經開咗鑼!

李八方

一格照片,一個故事,Follow蘋果Instagram!
BannerBanner