李八方online︱「忠誠的廢物」險釀流會

更新時間 (HKT): 2021.03.18 17:18
田飛龍同建制派葉國謙鬧完交,立法會就差啲流會,建制派醜態畢露。

中央連「完善」香港選舉制度一步都行埋,內地學者田飛龍就溫提建制派唔好做「忠誠的廢物」,可能有人被擊中要害,立即發圍狂鬧田飛龍係「廢柴學者」。呢頭鬧完交,嗰頭立法會就差啲流會,今次冇得賴民主派喇啩?

成個立法會都係建制派玩晒,議程上亦冇爭議性嘅嘢,建制派都可以開足兩日會,經已浪費咗唔知幾多罐午餐肉。

到周四下晝表決由經民聯梁美芬修訂、民建聯陳克勤提出嘅有關支援失業及就業不足人士議案嘅修正案時,自由黨邵家輝無啦啦話要記名表決。點知響完5分鐘表決鐘後,會議廳竟然唔夠人!

廖長江趕到 建制派拍晒手

其實好地地做乜記名表決,反正九成九都係建制派,不用分得那麼細;再講,響咗5分鐘都唔齊人,例如民建聯李慧琼、新民黨葉劉淑儀等都無影。究竟啲人去晒邊?召人返嚟嘅鐘足足響咗接近13分鐘,瀕臨流會邊緣先夠人,最後一位入場嘅仲要係「班長」廖長江,而廖入場時,成班建制派竟然拍晒手!而坐喺主席位嘅梁君彥就似乎黑晒口面,好唔滿意咁。

有建制派會後話,今次都係好大危機,當下已經諗到,若然流會,翌日報紙嘅標題就係「忠誠的XX流會」,好在廖長江成功達陣,先至避過一劫。

我哋有問過要求記名表決嘅邵家輝,佢就話「開會係議員嘅責任,最後都夠人啦!」至於點解廖長江抵達嘅時候要拍手?佢就話見廖咁嘅身形都可以跑得郁,梗係要拍手支持喎。

鄭松泰要投票留會議廳

至於非建制陣營嘅鄭松泰一直都留喺會議廳,似係幫建制湊夠人數,佢就話因為發言嘅時候講咗要投反對票,所以會留低投票喎。

其實呢,田飛龍話「忠誠廢物」論唔係針對建制派任何人,講嘅係一種現象,原來係真㗎。

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

一格照片,一個故事,Follow蘋果Instagram!
BannerBanner