李八方online︱遭容海恩批鬥M+藏品或違國安法 艾未未感遺憾:她不理解藝術

更新時間 (HKT): 2021.03.19 00:57

特首林鄭月娥噚日出席立法會質詢環節新民黨容海恩就對西九文化區「M+博物館」有藝術品涉違《國安法》好有興趣,問林鄭點處理,獲對方回覆會「警惕」。容海恩今朝繼續針對文藝界「毒草」,喺一個電台節目解釋,西九「M+博物館」其中一幅藝術家艾未未嘅作品,相中人以中指指向北京天安門廣場,認為動作「低俗」,質疑對中國不敬,甚至乎話呀,作品係瑞士人贈送㗎喎,質疑有冇任何人透過資助或任何形式支援引發市民對中央政府或香港政府嘅憎恨,重申有可能違反「港版國安法」。

咁容海恩到底想點?佢話呀,作品係可以喺私人地方展示,但M+博物館以公帑建造,唔應該展示對國家不敬嘅作品,既然出現爭論,加上令市民「不安」,認為應該先抽起,同時喺網站刪除作品簡介。佢聲稱唔認為要政治審查展品,但政府有責任檢視展品係咪對政權不敬,強調政府博物館有獨特審查機制係正當不過。

陳錦成:容海恩見識少

唔少藝術界對容海恩嘅建議好火滾。藝發局視覺藝術小組主席陳錦成喺電台節目話呀,M+博物館係專業博物館,藏品規定嚴格,有唔同嘅委員會監察收藏過程,符合國際慣例,認為艾未未有關作品基本方向係挑戰權威,如果只抽出對中國權威嘅挑戰、而未有留意對其他政權嘅挑戰,並非完整理解艾未未作品。

佢直接批評容海恩可能見識少,而且唔識文化藝術,話藝術館有教育作用,可以畀對方虛心去學,重申擔心日後造成自我審查。

容海恩死撐:藝術要尊重國家

容海恩之後回應被踩見識少時,就反駁話唔覺得係見識問題,而係對國家同中央尊重,又重申話有關展品喺M+博物館展示係唔合適喎,仲話任何藝術品都應該尊重任何國家,而本港藝術館應有專業同較高標準,包括尊重國家標準喎。

艾未未「興奮」作品獲認同

艾未未接受港台訪問時,話對事件感到遺憾,但同時覺得有啲興奮,認為係為他喺當今藝術史上投咗贊同票。佢形容,容海恩作為立法會議員,將藝術範疇視為與政治對抗,係對藝術唔理解,指藝術嘅核心價值係提出問題同對權威嘅質疑。艾未未又話,作品係瑞士前駐華大使烏利希克嘅收藏品,佢其後將大部份收藏品捐贈予M+博物館,烏利希克同中國關係良好,相信事件亦對佢帶來巨大衝擊。

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

一格照片,一個故事,Follow蘋果Instagram!
BannerBanner