隔牆有耳:琼子葉劉冇影 班長仆倒衝線 
廢物大派對險流會(李八方)

更新時間 (HKT): 2021.03.19 02:00

手機用戶請按此放大圖表

中央連「完善」香港選舉制度一步都行埋,內地學者田飛龍就溫提建制派唔好做「忠誠的廢物」,可能有人被擊中要害,立即發圍狂鬧田飛龍係「廢柴學者」。呢頭鬧完交,嗰頭立法會就差啲流會,今次冇得賴民主派喇啩?只能話議會太多「忠誠的廢物」。

鄭松泰稱留守投反對票

成個立法會建制派玩晒,議程上亦冇爭議性嘅嘢,建制派都可以開足兩日會,到噚日下晝表決由經民聯梁美芬修訂、民建聯陳克勤提出嘅有關支援失業及就業不足人士議案嘅修正案時,自由黨邵家輝無啦啦話要記名表決。點知響完五分鐘表決鐘後,會議廳竟然唔夠人。民建聯李慧琼、新民黨葉劉淑儀等都冇影。

究竟啲人去晒邊?召人返嚟嘅鐘足足響咗接近13分鐘,瀕臨流會邊緣先夠人,最後一位入場嘅仲要係「班長」廖長江,而廖一入場,成班建制派竟然拍晒手!而坐喺主席位嘅梁君彥似乎黑晒口面好唔滿意。

有建制派會後話,今次都係好大危機,當下已經諗到,若然流會,翌日報紙嘅標題就係「忠誠的XX流會」,好在廖長江成功達陣,先避過一劫。

八方有問過要求記名表決嘅邵家輝,佢就話「開會係議員嘅責任,最後都夠人啦。」至於點解廖長江抵達嘅時候要拍手?佢就話見廖咁嘅身形都可以跑得郁,梗係要拍手支持喎。

至於非建制陣營嘅鄭松泰一直都留喺會議廳,似係幫建制湊夠人數,佢就話因為發言嘅時候講咗要投反對票,所以會留低投票喎。

其實呢,田飛龍話「忠誠廢物論」唔係針對建制派任何人,講嘅係一種現象,原來係真㗎。

李八方

一格照片,一個故事,Follow蘋果Instagram!
BannerBanner