醜聞纏身胡肖霞遭追訪發難:唔能夠當我係賊咁圍住我!

更新時間 (HKT): 2021.03.19 20:45

退休法官胡國興胞妹胡肖霞被指旗下幼稚園員工在公務時間為其處理私事,兼涉粗暴對待幼兒。據悉教育局今午派員到涉事幼稚園視察,校長胡肖霞現身時向記者否認虐兒,僅承認曾託校工「順手」代為買餸。她又對現場追訪她的記者發難,「唔能夠當我係賊咁圍住我」。對於公器私用的指控,她反問記者:「你都發緊夢,咩叫做用公帑做私人嘢?」

教育局晚上回覆時承認,今曾到該校巡查,以進一步了解事件,重申已要求學校盡快作出調查,又呼籲提出指控者挺身而出,向當局聯絡或向執法部門舉報,指若事件查明屬實後必定會嚴肅處理 。

教育局分區主任到涉事幼稚園視察

據悉,教育局分區主任今午到大角嘴大同新邨聖德肋撒幼稚園視察及了解情況,多名記者趕至,校長胡肖霞在下午約3時現身並打算離開幼稚園。對於教育局人員曾否到場視察,胡未有正面回應,僅稱「我唔同你哋講嘢」,並欲打算折返回幼稚園,「你去問返教育局好唔好?唔好問我。」她又斥有傳媒連日錯誤引述其言論,「我講乜嘢,你哋都覺係假,亂咁作,錄低都係假。斷章取義,我而家冇辦法信你哋(傳媒)。」

否認曾虐兒 「冚唪唥掉轉頭寫」

至於會否再就公器私用及虐兒一事澄清,她表示「梗係唔係,都唔係事實嘅嘢點澄清?冚唪唥掉轉頭寫嘅」。她再三否認虐兒指控,反問「我做乜嘢要虐兒」,又說「講完都冇用」、「我話冇(虐兒),你哋寫咩?」

認曾叫代買餸 詭辯校工「本身都要買餸煮飯」

對於有教師指胡要求校工代為買餸,胡承認確有此事後卻稱:「你可以話我有又可以話冇」,「你都發緊夢,咩叫做用公帑做私人嘢?」她隨即又解釋:「咁我都唔係日日返呢度,咁我會搭佢(校工)順手幫我買啲」,並強調「梗係我畀錢啦,唔係邊個畀錢?」又指校工們本身都要「買餸煮飯」。

「我相信所有人寫出嚟嘅嘢都唔係我嘅嘢」

她又着現場記者別再追訪她,「你哋真唔能夠當我係賊咁圍住我,同埋我點相信你(記者),我相信所有人寫出嚟嘅嘢都唔係我嘅嘢。」記者表明有攝影機及錄音作實,胡則指「我最怕錄音,我哋啲人(教師)喺入面幾個月搞晒錄音,我都唔知道。」

據悉,胡肖霞昨日曾現身旗下慈雲山肖霞幼稚園,今早記者到訪該校,職員表示胡今天告假。有不願透露姓名的家長表示,對胡涉嫌虐待幼兒一事感到少許擔心,會主動問及女兒在校情況,但指「之前家姐係呢度讀都冇呢啲事」。

家長指被罵教師確實有哭泣

對於有聖德肋撒幼稚園教師早前爆胡肖霞進課室痛罵老師「黑心」、「畜牲」,致全班學生受驚痛哭,家長吳太(化名)透露,有關說法或有誇張成份,家長間流傳當時情況並非如此,「唔係全班喊,都唔係『抱頭痛哭』,淨係得一個小朋友喊」,但據學生透露被罵教師確實有哭泣。也有其他學生向父母詢問「黑心」一詞含意。

稱子女穿校服「俾人眼望望」

吳太指校方未向家長交代,但相信事件源於校長與教職員的矛盾:「而家好似好大牽連咁」,擔心會因此影響家長及學生,「我哋小朋友着住校服返學、孭住個書包返學,都會俾人眼望望」,甚至有人問她何時為子女轉校等。

吳太指從來未有聽過學校有虐兒情況;但若然確實,相信家長亦難以接受。她平日亦有碰見胡肖霞,「咁佢對家長梗係客氣啲...但實際內裏上係點梗係唔知道」。她贊同該校老師友善,目前學生返學心情未受影響。

另有菲律賓籍家長表示,就讀K3的兒子曾向她提及,昨日胡肖霞突然衝入課室,描述胡當時「get angry」,老師則在課室角落哭泣(the class teacher is crying in the corner )。

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

一格照片,一個故事,Follow蘋果Instagram!
BannerBanner