隔牆有耳:葉國謙暗寸田飛龍「低端」(李八方)

更新時間 (HKT): 2021.03.19 02:00

大陸學者、全國港澳研究會理事田飛龍早前發表被指係針對香港建制派嘅「忠誠廢物論」,民建聯葉國謙曾喺報章訪問反插田飛龍係「廢柴學者」,日前田飛龍在訪問中反駁葉國謙,話佢情緒化,仲不忘踩多腳,話「忠誠廢物」唔係針對建制任何人,而係講一種現象,即係好多「忠誠廢物」啦,仲話唔肯改進嘅建制派就唔該提早退休!政圈早已買定花生,等睇葉國謙還拖,佢噚日終於出招,暗寸田飛龍「低端」、講嘅係「廢話」,唔想再同佢拗!

指「忠誠」係人格表現

葉國謙噚日接受商台訪問時,就邊話唔太想再同田飛龍隔空罵戰,邊話如果作為一個學者,不能接受批評,「邊個低端由得佢自己決定啦」,強調「忠誠」係一種人格表現,「唔係喺能力上面」,指有啲人若「反骨」、「表裏不一」,咁先係「唔應該有嘅價值」。

佢重申,至今覺得田飛龍嘅「忠誠廢物論」係對建制派「不禮貌」,而且「不能接受」,又指「對於呢啲『廢話』,唔想再同佢有乜嘢論戰!」仲諷刺田飛龍聲稱建制派「要改進」係「媽媽必定係女士」嘅道理,直指「田先生都要改進吓自己」。

李八方

一格照片,一個故事,Follow蘋果Instagram!
BannerBanner