李八方online︱簽名支持中央清算忠誠的廢物

更新時間 (HKT): 2021.03.20 14:07
設計圖片

中央「完善」香港選舉制度,建制派就即刻仆落街擺街站支持。咁全國港澳研究會理事田飛龍話打晒開口牌,話中央唔要「忠誠的廢物」,點解唔可以支持?為咗響應田飛龍,大埔區議員林名溢都落街擺街站,呼籲市民支持中清算忠誠的廢物!

今朝香港梅州社團會,同埋香港深圳社團總會,喺大埔街市外擺街站,叫市民簽名撐人大決定。林名溢亦都喺同一地方擺街站,呼籲市民簽名支持中央清算「忠誠的廢物」,佢哋仲有口號:「廢物治港,社會動盪;兔死狗烹,經費慳返(番)」㖭。

有街坊簽完撐人大決定後再簽清算「廢物」

林名溢嘅街站由朝早10點擺到中午,都收集到幾十個支持者簽名,佢仲話簽名支持嘅市民係跨光譜,因為有街坊簽完撐人大決定後,亦都過嚟簽名支持中央清算「忠誠的廢物」,所以相信呢啲街坊係真愛國人士。

林名溢嘅街站當然唔會擺一次就完,佢亦都設有網上聯署,市民可以選擇點樣清算「忠誠的廢物」,選項包括處死、抄家、沒收其本人及家人外國護照等,都幾多元化。至於收集到嘅簽名點處理,林名溢仲諗緊。

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

一格照片,一個故事,Follow蘋果Instagram!
BannerBanner