疫苗接種︱酒吧業批陳肇始以打針換開舖如「勒索」 促復活節前重開

更新時間 (HKT): 2021.03.21 19:17

自第四波疫情爆發,酒吧業已被勒令停業逾3個月,至今復業無期。業界要求政府在復活節旺季前重開酒吧,否則估計有過半持牌酒吧結業,同時要求政府向業界發放資助,並以停業時間、場所規模及租金等計算資助額。

食衞局局長陳肇始早前表明,若疫苗接種率不理想,不排除收緊社交距離措施,甚至關閉部份處所,變相將疫苗接種與處所營業掛鈎。香港持牌酒吧會所聯會創會會長梁立仁斥疫苗接種率低,政府責無旁貸,更炮轟政府多番以酒吧業生計勒索,以復業要求行業配合種種假「自願」措施。

梁怒斥,「係真真正正感覺到被勒索,同埋你綑綁咗兩樣根本上係唔關事嘅嘢」。他批評政府只限制部份場所,卻放寬其他場所營業,認為政府不能以疫苗接種率去衡量是否容許酒吧復業,「你應該係衡量我哋本身酒吧業裏面有無守規矩,(酒吧)自己啲抗疫嘅措施做得幾足,其實依家你邊間(酒吧)有事,你咪停邊度囉,邊座大廈有事,你都封一座大廈啦」。

「點解次次打完之後出咗事,先至有人出嚟講嘢?」

酒吧業界內亦有聲音擔憂,政府會否以接種疫苗,作為容許酒吧等場所復業的條件。梁指,業界普遍認同接種疫苗為大趨勢,但大部份人仍抱觀望態度,希望待有更多臨床數據再接種疫苗:「的而且確,政府(喺疫苗上)畀到巿民嘅信心係唔高。即係面癱嗰樣嘢,隻藥未打之前一早已經有列晒出嚟,有咩事有咩事,點解你係要次次打完之後出咗事,先至有人出嚟講嘢,即係唔可以令巿民安心多啲呢?依個責任唔係我哋到㗎。」

香港調酒師工會主席侯翠珊,更以「今日酒吧,明日香港」,形容酒吧業的情況及社會的未來。她指,政府經常以給予酒吧頁假希望的形式,促使行業妥協,但可以配合後又會「反口」,最後一無所得。她坦言,酒吧業界的處境是「次次勒索完都係撕票」、「最後得個桔」,批評政府行事的風格相當值得社會大眾警惕。

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

一格照片,一個故事,Follow蘋果Instagram!
BannerBanner