47民主派被控︱尹兆堅獲外籍囚友祈禱保釋成功 張文光:天主、基督、錫克、佛教、穆斯林都齊晒

更新時間 (HKT): 2021.03.21 14:10

自「2.28大起訴」後,因參與民主派初選被控「串謀顛覆國家政權」的47人,至今已被還押約三星期,當中僅11人獲准保釋。今早繼續有被捕者親友,風雨不改到荔枝角收押所探訪,其中尹兆堅的民主黨戰友引述指,與尹同倉的外籍囚友,均為他下周二保釋覆核成功祈禱,「天主教、基督教、錫克教、佛教、穆斯林,都齊晒呀」;梁國雄妻子則指,長毛閱報得知有中國維權人士女友被捕,對自己無法現身聲援感到「心悒」。

民主黨主席羅健熙與前立法會議員張文光結伴探望尹兆堅。羅指,尹轉回吃私飯後「個人又漲返小小」,且狀態不錯,目前正為下周二的保釋覆核作準備;張亦指,尹就自己的身型「初頭又話自己瘦尹,跟住想自己係壯尹,點知而家又肥返少少」。

一晚閱畢張文光所著10萬字旅遊書

張文光續指,尹兆堅在收押所中「睇書睇得好快」,如早前為他帶進了一本自己所著的旅遊書,「嚇死我,我本書都成10萬字,一晚睇晒,我話佢好誇張,佢話『係呀,時間就係咁過』」。張又說,與尹同倉的不少外籍在囚人士,均為他保釋成功祈禱,「泰國、越南嘅人用佛教嘅方法為佢祈禱,巴基斯坦就用穆斯林嘅方法,仲有印度嘅錫克教,牧師、樞機又嚟探佢」,自己亦希望他在眾多祝福下,可成功獲保釋。

長毛獲悉許志永女友被捕 無法現身聲援感心悒

梁國雄妻子陳寶瑩指,長毛今日精神不錯,但閱《南華早報》時,得知中國民運人士許志永的女友李翹楚被捕,自己卻因身陷囹圄無法發起聲援,對此感到「有啲心悒」,「以前我哋一定會去新華社聲援,而家反而要人哋聲援(自己)」。陳又指,15分鐘探訪時間「冇乜好講」,與長毛都是一般閒談,但他亦表示在收押所生活沉悶,「咁耐都淨係見到范國威,一齊放風可以傾幾句偈,談起往事⋯⋯好似2011年五區公投,講返以前嘅嘢,打發吓時間。」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

一格照片,一個故事,Follow蘋果Instagram!
BannerBanner