隔牆有耳:假澳洲財長設騙局 許智峯唔落叠(李八方)

更新時間 (HKT): 2021.03.22 02:00

因國安法流亡海外嘅前民主黨立法會議員許智峯,本月初由英國轉戰澳洲,目前仍喺澳洲達爾文(Darwin)接受隔離。阿峯噚日向八方透露,近日佢收到一名自稱「澳洲財長」Simon Birmingham嘅WhatsApp訊息,聲稱有「好重要同保密」嘅嘢要同佢傾,話想向佢提供幫助,但講講吓,就話呢個「行動」唔方便由澳洲政府直接出錢,叫阿峯滙啲錢去香港荃灣一個商場內嘅洗衣舖。

Simon Birmingham電話被入侵

阿峯收到呢個訊息後,即時覺得相當可疑,認為極可能係詐騙訊息,並喺問過澳洲當地記者後,得悉該名官員嘅電話近日曾被黑客入侵,令佢相信可能有嚟自香港嘅騙徒想乘機呃錢。佢又話,由於早已覺得呢個訊息唔妥,所以並無滙錢去呢間洗衣舖,至今冇任何損失,笑指今次事件「好似拍戲情節咁樣」。

經過今次事件後,阿峯話嚟緊將加強警惕,並透露完成隔離程序後,下星期會飛去澳洲另一個城巿落腳,目前一家人情況安好。佢又話,隔離期間十分忙碌,不時都要受訪,亦有同澳洲嘅議員同官員接觸,傾吓下一步工作。

李八方

一格照片,一個故事,Follow蘋果Instagram!
BannerBanner