寫給47人的家書︱快必,記唔記得日本富士山上嗰支水?

更新時間 (HKT): 2021.03.22 00:01

47名民主派因參加初選被控違反《國安法》下的串謀顛覆政權罪,至今僅11人,即劉偉聰、呂智恆、楊雪盈、林景楠、黃碧雲、鄭達鴻、彭卓棋、柯耀林、何啟明、施德來及李予信獲准保釋。不見天日的歲月,或許很漫長,《蘋果》邀請牆外的人將思念化為家書,默默向被囚者打氣。

得志:

唔經唔覺,我哋同你認識超過40年……

仲記唔記得2年幾前,我同你一齊挑戰日本富士山?我哋兩個嗰陣都有高山反應,但嗰時你都會鼓勵我「頂埋佢」,甚至喺搵唔到補給站嘅情況,都將僅餘嘅一支水分享畀我。

2014年J同學父親過世時,正值社運期間,你同樣準時出席喪禮;翌年喺佢父親死忌當日,你仍舊send message慰問。

一舉一動都令我哋好感動,不但願意助人,亦知你對弱勢社群充滿愛。

此時此刻,我哋仍懷念有你在嘅聚會,因為每次你嘅出席都會帶畀我哋無窮嘅歡樂,即使你擺完街站後沙聲,但從不向我哋展示倦容。

雖然你形象鬼馬,經常作弄他人,又成日幫人改花名,猶如「大頑童」,但我哋知你係一個無比正直、膽大心細、有嗰句講嗰句嘅人;你亦係一位誠懇嘅教徒,不但風雨不改返教會,甚至修讀宗教及神學碩士,甘願放棄榮華富貴,寧願走一段「窄路」,而你亦影響咗我哋對信仰嘅睇法。

對於你嘅遭遇及處境,我哋理解亦支持,知你鍾意香港,亦知自己所做嘅事。我哋盼能送「堅韌」一詞予你,同盼天父看顧你,有平安的心,不容你繼續被囚困,讓你能向標杆直跑。

我哋亦承諾,會繼續為你照顧你太太同忌廉,希望可以再同你一齊暢飲威士忌!

老同學

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

一格照片,一個故事,Follow蘋果Instagram!
BannerBanner