差餉2021︱疫下尖沙嘴食肆生意暴跌八成 每月補貼逾15萬

更新時間 (HKT): 2021.03.22 10:15

武漢肺炎疫情下政府動輒收緊食肆用餐人數,一度將堂食人數收緊至2人一枱,去年更突然全面禁堂食,遭民間大力抨擊後始肯撤招,朝令夕改令飲食業無所適從,禁止晚市堂食逾2個月更是致命傷。

有尖沙嘴食肆負責人直言,禁晚市堂食令生意額暴跌八成,即使業主減租5%,仍要每月補貼15萬、16萬元,並減少兼職人手、推外賣折扣吸客,他坦言擔心疫情重來,若政府持續禁晚市,餐廳隨時年內捱不住,「每一間都係心血,唔想無情情執咗佢,希望唔好行到呢一步。」

禁晚市 69日只剩兩成生意

位於尖沙嘴「食街」厚福街的泰國餐廳「船皇」,負責人Terrance Ip接受訪問時透露,此店屬該品牌第二間分店,19年8月時開幕,當時剛經歷社會運動,遊行期間生意額略為受影響,約跌兩成,但都不及武漢肺炎疫情帶來的影響嚴重。

他稱去年初至今,生意最嚴峻可數政府禁止晚市堂食,「最嚴峻係第三波(疫情),無晚市、入座率得一半,69日就只剩得兩成生意,(收入)連租金都cover(抵銷)唔到。」該店連銅鑼灣及大埔店共有3間分店,「最嚴重嗰時,每間舖每月要貼15萬、16萬。」

為開源節流,他曾減少兼職人手,推出外賣8折優惠,希望薄利多銷吸客。幸好至2月中政府終恢復晚市堂食,「(生意額)上返五、六成,回一回氣,租金勉強cover到,但都要蝕。」他稱尖沙嘴人流遠不及從前,缺少了遊客及白領客人,「早排一爆健身群組,生意額即刻下跌。」

「唔想無情情執咗佢,希望捱埋佢」

Terrance透露,業主在疫情最嚴峻時願意減租5%,「好過無,如果按合約精神,其實唔減都得,聽過有業主企硬唔減,亦聽過有業主主動減一半租」。他稱政府推出的「保就業」計劃約幫補六成開支,但「都係唔夠交租,去到舊年11月有飲食業資助,但金額仲少」。

他預料下一波疫情隨時重來,暫未有結束任何分店的打算,「每一間都係心血,唔想無情情執咗佢,希望唔好行到呢一步,希望捱埋佢」。但他直言,若疫情持續嚴峻又再度禁晚市堂食則有結業危機,「應該頂到3個月,唔好蝕得咁甘就得」。

他稱明白防疫需要,但希望政府措施不要「改來改去」,如早前全面禁堂食又隨即恢復,「真係𢯎晒頭」,冀政府能繼續推出資助,否則將有更多餐廳捱不住結業。

蛇王二設零售店只開半年:想話畀熟客知我哋近況

在銅鑼灣波斯富街屹立近40年的老字號蛇王二,去年4月不敵疫情結業。蛇王二前店長羅長熙同年9月在謝斐道開設零售店,只售賣蛇羹及臘味等,不設堂食。但羅長熙稱,該店一開始只簽了半年租約,並於上月底結業,「主要只係做一個冬天,想話返畀啲熟客知我哋近況。」

羅長熙直指,受武肺疫情影響,銅鑼灣高價搶舖風光不再、多條街道吉舖湧現,「30幾年來都未見過,係好多吉舖。」雖然疫情重創各行各業,但他笑言,租金終於回復「人性化」水平,「當日搶高晒啲租嘅元凶,依家全部消失晒。」

他又透露,正在銅鑼灣區物色舖位,「嚟緊都想搵返間地舖開返堂食」,租金較高峯期大跌最少一半,「要睇吓係咩位置、同邊條街,以前可能一個約1,000呎地舖要60萬,依家隨時10萬至15萬租金。」

記者 鍾雅宜 譚靜雯

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

一格照片,一個故事,Follow蘋果Instagram!
BannerBanner