隔牆有耳:囚友教路 尹兆堅潤手霜gel頭(李八方)

更新時間 (HKT): 2021.03.22 02:00
■尹兆堅家書一開首就訴說對太太及子女掛念之情。資料圖片

初選案大部份被告未審先囚,申請保釋被拒。被告之一嘅民主黨尹兆堅寫畀太太同仔女嘅家書,笑中有淚,佢同家人講日日都掛念佢哋,之後分享獄中情況,被囚水飯房嘅佢,係嗰度唯一仍享有聽收音機、閱報等福利嘅人,而水飯房囚友幫咗佢好多,用好多創意應付獄中資源匱乏嘅問題。阿尹舉例,睇完報紙留嚟墊枱食飯,用橡筋綁起廁紙筒放筆、梳同牙刷,不過阿尹話囚友最厲害嘅發明,係用潤手霜gel頭,阿尹仲話上庭時同案嘅朱凱廸、馮達浚、鄒家成等見佢髮型整齊都大讚,問佢點做到。

至於噚日62歲牛一嘅黃碧雲,本月11日獲准保釋,佢喺社交媒體出post話,「誰想到今年的生日,差不多就要在大欖的單人囚室獨自度過了?」佢噚日同親友一齊過生日,契仔仲親自焗咗芝士蛋糕畀佢,佢感謝各位嘅祝福,「人間有情,全部收到!」生日願望就係所有人平安,早日重獲自由,同家人團聚。

李八方

一格照片,一個故事,Follow蘋果Instagram!
BannerBanner