寫給47人的家書︱之鋒,我都係《進擊的巨人》粉絲!

更新時間 (HKT): 2021.03.23 00:01

47名民主派因參加初選被控違反《國安法》下的串謀顛覆政權罪,至今僅11人,即劉偉聰、呂智恆、楊雪盈、林景楠、黃碧雲、鄭達鴻、彭卓棋、柯耀林、何啟明、施德來及李予信獲准保釋。不見天日的歲月,或許很漫長,《蘋果》邀請牆外的人將思念化為家書,默默向被囚者打氣。

之鋒:

最近有時間睇返《進擊的巨人》(真係因為你,先心血來潮想睇吓),原來真係咁好睇,怪唔得你話好,又唔畀人劇透,(劇情)確實係好緊張,又有啲出人意表(不過寫呢篇《寫給47人的家書》時係未睇完,唔知最後結局)。

你係咪會最鍾意艾倫主角呀?我就唔係,因為佢成日懷疑自己,要揀會揀三笠,真係好型(嗰條紅色頸巾真係好襯佢),但有乜可能咁厲害以一敵幾十個巨人都得,咁使乜其他調查兵團?但睇戲都係唔好駁戲。艾倫朋友艾爾敏都好好,好聰明。

最近少咗睇到你獄中消息,所以諗起可以喺《寫給47人的家書》話你知,有人都係《巨人》粉絲(雖然遲咗好多);如果好似艾倫咁,背負咁多期望,成日要戰鬥,真係幾攰,有需要都要休息。

就算之後睇完結局,都唔會寫信畀你話你知,你一定可以自己睇到。希望其他《巨人》粉絲都寫信畀你分享吓。(註:寫信畀之鋒可寄至九龍中央郵政局郵政信箱73962號)

「甚麼都無法捨棄的人,甚麼也改變不了。」我明白呀。

已成《巨人》粉絲的EE

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

一格照片,一個故事,Follow蘋果Instagram!
BannerBanner