隔牆有耳:打科興致盲?橡皮圖章 忠誠廢物 
禁攝告示下selfie(李八方)

更新時間 (HKT): 2021.03.23 02:00

手機用戶請按此放大圖表

特首林鄭月娥噚日帶頭打第二針科興疫苗,講到明唔滿意全港接種率得5.3%,晏晝接住打針嘅「忠誠廢物」,啊講錯,應該話立法會議員先啱,佢哋等打針期間,不忘喺facebook開live直擊政總二樓現場情況,完全無視周圍貼住注射區不准拍攝、錄影同錄音嘅告示。

「直播主持」包括有民建聯議員陳恒鑌、柯創盛同工聯會郭偉强,就連公務員事務局局長聶德權、食衞局長陳肇始都主動中途「攝鏡」,交足戲笑晒口呼籲市民打針。民建聯鄭泳舜亦係咁幫黨友「打卡」,一見醫護人員準備打針,就離開等候區、擅闖注射區,用手機影低打針過程,其實注射區貼晒不准拍攝、錄影同錄音告示,不過現場又冇工作人員阻撓,唔知一般市民自拍做live又得唔得?定係建制議員有特權?

蔣麗芸針後尿頻

打完疫苗,循例都要講吓感受啦,平時開會特別易瞓嘅民建聯黃定光話,打完針感覺「so good」,精神奕奕、龍精虎猛。同黨嘅蔣麗芸就話聽聞打針前後要飲多啲水,所以除咗尿頻要去多幾轉廁所之外,都冇咩特別唔舒服。

不過亦有議員冇嚟政總打第二針。工聯會麥美娟話,同黨嘅陸頌雄因發燒,徵詢過醫生建議後決定唔打,話市民都要視乎身體狀況先好去打針。

李八方

一格照片,一個故事,Follow蘋果Instagram!
BannerBanner