李八方online︱林健鋒發言抹黑民主派 死物都頂唔順嬲到「爆」

更新時間 (HKT): 2021.03.24 20:05
經民聯林健鋒讀稿時,一讀到:「之不過,事實係勝於雄辯,疫情肆虐之前」時,枱頭放講稿嘅發言架,突然成個散開。

立法會今日開會討論皇崗口岸「一地兩檢」期間,身兼行會成員嘅經民聯林健鋒讀稿力撐時,忽然狂抽民主派前立法會議員水,話兩年前立法會討論高鐵「一地兩檢」安排時,好多民主派都「阻住地球轉」,提出好多「抹黑」言論,包括指高鐵工程係「大白象」、「一地兩檢」安排違憲、等同割地等,點知佢一講到:「之不過,事實係勝於雄辯,疫情肆虐之前」呢句時,枱頭放講稿嘅發言架,突然成個散開,唔通死物都有靈性?

此時林健鋒都似乎有啲嚇親,揸住塊散開嘅木板,口窒窒同立法會主席梁君彥講:「主席,要⋯⋯要整整啊⋯⋯對唔住啊⋯⋯呢個唔係我嘅錯⋯⋯立法會啲⋯⋯啲物件而家越嚟越老嘞⋯⋯有可能要⋯⋯」。梁君彥聽到後只食花生,默不作聲陰陰嘴笑,之後就由立法會職員為林健鋒換過新講台架,畀佢繼續發言表忠。

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

一格照片,一個故事,Follow蘋果Instagram!
BannerBanner